Ceyhun Məmmədov: “Azərbaycanda guya, "dindarların" kütləvi həbsi həyata keçirilir”
Azərbaycanda İranın casus şəbəkəsinə qarşı əməliyyatlar davam edir. Bir müddət əvvəl müvafiq qurumların həyata keçirdiyi əməliyyat zamanı Bakının Binə qəsəbə sakini Əli Behişti də saxlanıldı. Behişti moizələrində hər zaman İranın molla rejimini təbliğ edirmiş. Xatırladaq ki, Azərbaycan hüquq-mühafizə orqanlarının İranın casus şəbəkəsinə qarşı keçirdiyi son əməliyyatlarda 19 nəfər saxlanılıb. İfşa olunmuş casus şəbəkələrinin üzvlərinin Azərbaycanda iğtişaş törətmək, dövlət çevrilişi həyata keçirmək, konstitusion quruluşu devirmək və şəriət hökmləri ilə "Kərimə dövləti" qurmaq planları üzə çıxıb. Lakin ölkə daxilində və xaricdəki bəzi qərəzli şəxslər İran agentlərinin zərərsizləşdirilməsini "dindarların həbsi", "inanclı insanlara qarşı təzyiq" kimi təqdim etməyə cəhd göstəriblər.
Millət vəkili Ceyhun Məmmədov bildirib ki, son günlər Azərbaycanın hüquq-mühafizə orqanları İranla əlaqədə şübhəli bilinən şəxslərin həbsi istiqamətində bir sıra tədbirlər həyata keçirir. Ancaq son proseslərdə dövlətin və dövlətçiliyin yanında ola bilməyən destruktiv qruplar geniş təbliğata başlayıblar ki, Azərbaycanda guya, "dindarların" kütləvi həbsi həyata keçirilir. Hətta bir sıra hallarda ciddi şişirdilmiş rəqəmlər də səsləndirirlər: "Əlbəttə, burada əsas məqsəd dindar kontingentin rəğbətini qazanmaq və özlərini onların müdafiəçisi kimi təqdim etməkdir. Bu həm də onu göstərir ki, bütün bu qruplar eyni mənbədən qidalanır və təlimatı eyni yerlərdən alırlar. Böyük ehtimal ölkəmizlə bağlı beynəlxalq təşkilatların hazırladıqları növbəti hesabatlarda da bu məsələ ilə bağlı tənqidi fikirlər yer alacaq. Burada da əsas məqsəd Azərbaycana təzyiqi artırmaq olacaq. Heç şübhəsiz ki, bu addımlar Azərbaycanın hüquq-mühafizə orqanları tərəfindən sırf təhlükəsizlik məqsədilə atılır. Dünyanın müxtəlif bölgələrində ayrı-ayrı ölkələr zaman-zaman belə tədbirləri təhlükəsizlik məqsədilə həyata keçirirlər.
Həbs olunan şəxslərin sayı, həbs olunma səbəbi və cinayətləri barədə növbəti mərhələdə ictimaiyyətə geniş və ətraflı məlumatın veriləcəyinə heç kimin şübhəsi olmasın".
