Sülh müqaviləsinin Gürcüstanda imzalanması baş tuta biləcək məsələdir
Əgər Ermənistan razılaşarsa, qonşu ölkənin tranzit imkanlarından yararlana bilər
Əgər Ermənistan razılaşarsa, qonşu ölkənin tranzit imkanlarından yararlana bilər
"Azərbaycan tərəfi Ermənistanla sülh müqaviləsi bağlamaq istiqamətində bütün variantları sınaqdan keçirir. Gürcüstan platforması daha real variantlardan biridir".
Bu sözləri "Sherg.az"a açıqlamasında siyasi elmlər doktoru, professor Cümşüd Nuriyev deyib. Professor bildirib ki, Rusiya, Avropa ABŞ uzun müddət ərzində Azərbaycan-Ermənistan münasibətlərini tənzimləmək istəməyib:
"Həmişə bu münaqişəni dondurublar, özlərinin maraqlarına uyğun hərəkət ediblər. Hazırda münaqişə Azərbaycan tərəfindən sona çatdırılıb. Ermənistan da bunu istəyir, amma müəyyən qüvvələr Ermənistan prezidentini sıxışdırırlar. Azərbaycan və Ermənistan sülh müqaviləsi irəli çıxarılırsa, deməli, bu, Bakının əsas məqsədidir. Görüş üçün Tbilisi variantına üstünlük verilməsinin bir neçə əsası var. Bilirsiniz ki, "3+3" formatı var. Yəni 3 müsəlman və 3 xristian dövlətinin bir araya gəlməsi və ortaq platformada məsələlərin müzakirə edilməsi nəzərdə tutulur. Həmçinin burada "Qafqaz Evi" məsələsi var. Qafqazda sülh hər üç respublika üçün lazımdır. Digər yandan Gürcüstan-Azərbaycan münasibətləri kifayət qədər yaxşıdır. Bu, Ermənistan üçün də böyük şansdır. Əgər Ermənistan sülh sazişini Gürcüstan üzərindən imzalayarsa, qonşu ölkənin tranzit imkanlarından yararlana bilər. Məncə, bu, baş tuta biləcək məsələdir".
Qeyd edək ki, Prezident İlham Əliyevin Gürcüstan səfərində qonşu ölkənin vasitəçiliyi, Azərbaycan və Ermənistan danışıqları üçün Tbilisinin görüş məkanı olması təklifi də gündəmə gətirilib. Dövlət başçısı bildirib ki, Ermənistandan razılıq olarsa, tərəflər Gürcüstanda ikitərəfli və üçtərəfli görüş keçirə bilərlər: "Fikrimcə, bu sahədə ən düzgün seçim həm tarixi əlaqələri, həm də coğrafi faktoru nəzərə alaraq, əlbəttə ki, Gürcüstan ola bilərdi".
