Ermənistan silahlı qüvvələrinin bölmələri dünən saat 13:40-da Basarkeçər rayonunun Zərkənd yaşayış məntəqəsində yerləşən mövqelərindən Kəlbəcər rayonunun Yellicə yaşayış məntəqəsi istiqamətində yerləşən Azərbaycan Ordusunun mövqelərini avtomat və snayper tüfəngindən istifadə etməklə fasilələrlə atəşə tutub.
Bu barədə Müdafiə Nazirliyinin Mətbuat xidmətindən məlumat verilib.
Azərbaycan Ordusunun şəxsi heyəti arasında itki yoxdur.
"Əməliyyat şəraiti bölmələrimizin nəzarəti altındadır", - MN-in məlumatında bildirilib.
Qarabağ qazisi Kamil Musavi düşmənin davam edən provokasiyalarını“Sherg.az”a təhlil etdi:
“Ermənilər müxtəlif qüvvələrin təhriki ilə atəşkəsi pozurlar. Onlar Qarabağı azad etməyimizlə barışmırlar və guya torpaqları özlərinə “qaytarmaq” istəyirlər. Biz otuz il sülh istəsək də, düşmən buna yaxın durmadı. Fikrimcə, təxribatlar davam edərsə, Azərbaycan anti-terror əməliyyatları ilə düşmənin ağlını başına gətirəcək. Ordumuz buna hazırdır”.
