Nikol Paşinyan yaranan maliyyə itkisini Fransa hesabına doldurmağa çalışacaq
USAİD ləğv edildikdən sonra Ermənistan başqa maliyyə mənbələri axtarmalıdır. Paşinyanın hökumət maliyyəsi əhəmiyyətli dərəcədə kəsilir və onun ABŞ-dan dəstəyi təhlükə altındadır. O, bu problemlərini həll etməsə, gələcəkdə Ermənistanda başqası hakimiyyətə gələ bilər. Bunu rusiyalı politoloq Dmitri Solonnikov “Moskva-Bakı”ya müsahibəsində Paşinyanın ABŞ və Fransaya səfərini şərh edərkən deyib. O bildirib ki, ABŞ-da hakimiyyətə gələn Tramp Amerika büdcəsini mənimsəyən, müxtəlif ölkələrin müxtəlif rejimlərinə maliyyə göndərən strukturlarda korrupsiyaya qarşı mübarizə aparmağa başladı. Tramp yalnız ABŞ-ın konkret ölkə ilə qarşılıqlı əlaqədən hansı fayda əldə edəcəyi və bu ölkənin ABŞ-a nə verə biləcəyi ilə maraqlanır. Ermənistanın baş naziri ABŞ-a gələrək, “bizə kömək edin, biz çox yaxşıyıq” deyərək, maliyyənin davamlı olmasını istəsə, Tramp administrasiyasına maraqlı olmayacaq. Paşinyan kuratorlarından birini satsaydı və korrupsiya sxemlərindən danışsaydı, o zaman Tramp administrasiyası ilə razılığa gələ bilərdi. Bunu etməyibsə, o, açıq-aydın heç nəyə nail olmayıb. Ermənistan mətbuatında yayılan məlumatlara əsasən, Paşinyan heç bir məqsədinə nail olmadan Ermənistana qayıdıb və nəticədə o, ABŞ-da özünü düzgün aparmayıb. Görünür, Paşinyanın Trampa yanaşması o qədər də uğur qazanmayıb və Makronla danışıqlara gedib, çünki İrəvan hesab edir ki, Ermənistan hakimiyyətini dəstəkləməklə yaranan maliyyə boşluqlarını kimsə doldurmalıdır. Paşinyan ancaq Makrona arxalana və ondan daha çox pul və silah istəyə bilər. Bunun müqabilində o, bölgədə Fransanın daha çox iştirakını təklif edəcək.
Siyasi Tədqiqatlar Mərkəzinin sektor müdiri, politoloq İlyas Hüseynov “Sherg.az”a söyləyib ki, Donald Trampın hakimiyyəti dövründə Amerika Birləşmiş Ştatlarının siyasəti tamamilə dəyişib:
“Böyük biznesmen olan Tramp yalnız ölkənin iqtisadi maraqlarını güdür və burada ABŞ milli mənafeləri kontekstində məsələləri nəzərdən keçirir. Ermənistanın Baş naziri Nikol Paşinyan çox böyük istəklə ABŞ-yə səfər etsə də, səfərdən sonra yayılan məlumatlara görə,o, niyyətinə nail olmayıb. Çünki Ermənistanın dövlət büdcəsinin əhəmiyyətli bir hissəsi iyanələr, Qeyri Hökümət Təşkilatları və vətəndaş cəmiyyəti sektorunun fəallığı hesabına formalaşır. USAİD də daxil olmaqla bır sıra media qrumları və institutlar ABŞ rəhbərliyi tərəfindən olan maliyyədən məhrum olacaqlar. Dolayısı ilə həmin maliyyənin Ermənistan üzrə kəsilməsi də reallaşacaq. Nikol Paşinyan həqiqətən də Bayden administrasiyası dövründə törədilən fəaliyyəti ələ verməyib və bununla kifayətlənib. Bu isə yeni administrasiyanı qane etmir və bunun nəticəsində əhəmiyyətli resursdan Ermənistanın siyasi rəhbərliyi azad olacaq. Bu Ermənistan daxilində narazılıqlara, iqtisadi çətinliklərə və sosial problemlərin artmasına gətirib çıxara bilər. Dolayısı ilə də Nikol Paşinyanın hakimiyyətini təhdid altına salar. Ona görə də Nikol Paşinyan yaranan maliyyə itkisini Fransa hesabına doldurmağa çalışacaq. Lakin Fransa daxilində etirazlar, geosiyasi savaşlar, müstəmləkəçilik siyasətinin iflası və digər siyasi problemlər baş qaldırmaqdadır. Hazırki reallıqda Fransanın Ermənistanın iqtisadi problemlərini öz öhdəliyinə götürməsi inandırıcı görünmür. Hesab edirəm ki, Ermənistan real siyasət yürütməyə borclu olacaq”.
