Ermənistan Rusiyaya Qərbin sanksiyalarından yayınmaqda köməklik göstərir
Ermənistan Rusiyaya Qərbin sanksiyalarından yayınmaqda köməklik göstərən ölkələr sırasındadır. Bu, "Nyu-York Tayms" qəzetindəki məqalədə deyilib. ABŞ və Aİ-nin yüksəkvəzifəli məmurlarına istinad edən müəllifin sözlərinə görə, Ermənistandan Rusiyaya silah istehsalında həlledici əhəmiyyət daşıyan çiplərin tədarükü artıb. Qeyd olunub ki, 2022-ci ildə Ermənistan ABŞ-dən 2021-ci illə müqayisədə 515 faiz daha çox, Aİ-dən isə 212 faiz daha çox çip və prosessor idxal edib. Sonra isə 97 faiz eyni məhsulları Rusiyaya ixrac edib. Beləliklə, aydın olub ki, Qərbin sanksiyalarından yayınaraq malların Rusiya və ya Belarusiyaya qanunsuz yönləndirilməsində Ermənistandan istifadə olunur. Sənədə əsasən, daha çox yayılmış taktikalardan biri məhdudiyyətlərdən qaçmaq üçün kənar vasitəçi və ya məntəqələrdən istifadədir.
Politoloq Azər Qasımov "Şərq"ə açıqlamasında bildirib ki, Ermənistan Baş naziri Nikol Paşinyan ölkəsinin iqtisadiyyatındakı cüzi artımı inkişafla əlaqələndirib. Hətta Azərbaycanın bunu gözü götürmədiyini iddia etmiş, sərhəddəki gərginliyin bununla əlaqəli olduğunu demişdi:
"Rusiyanın mallarını öz adına alıb-satmaq nə vaxtdan "inkişaf" olub?. Qərbin bu maxinasiyadan əvvəldən xəbəri var idi və bu, bir sıra Qərb analitiklərinin çıxışlarında vurğulanırdı. Onlar Ermənistana, Gürcüstana xəbərdarlıq edirdilər ki, bundan imtina etsinlər. Qərbin Ermənistana hansısa ciddi təzyiq edəcəyinə ehtimal vermirəm. Lakin müxtəlif kanallarla bunun qarşısının alınması üçün addımların atılacağı şübhəsizdir. Qərb bu məqsədlə Ermənistana çip və Rusiyaya strateji məhsul satan firmalara sanksiyalar qoyacağını elan edə bilər. Bu, sanksiyalardan əlavə yollarla yayınanların qarşısını alar. Amerika bunu Çin şirkətlərinə tətbiq edib. İrəvan fürsətdən yararlanıb mənfəət əldə etmək istəyir. Görünən odur ki, yaxşı da pul qazanır. Buna görədir ki, Paşinyan Hindistandan silah almaqdan dəm vurur. Ancaq Qərb Ermənistanın hərəkətlərinə imkan verməyəcək".
