Xəbər verdiyimiz kimi Xarici işlər naziri Məhəmməd Cavad Zərif Azərbaycanda səfərdədir. Bu gün Prezident İlham Əliyev iranlı naziri qəbul edib.
Səfərin əsas məqsədi kimi ikitərəfli münasibətlərdəki son inkişaflar, ən vacib regional və beynəlxalq məsələləri müzakirə etmək qeyd olunur. Lakin
Politoloq İlqar Vəlizadə “Sherg.az”a bildirib ki, bu səfər Zərifin nazir qismində Azərbaycana, ümumiyyətlə, regiona son səfəridir:
“Çünki yaxın həftələrdə İranda prezident seçkiləri baş tutacaq. İran prezidenti Həsən Ruhani və onun komandası artıq öz vəzifələrini təhvil verəcəklər. Çünki Ruhani üçüncü dəfə prezident seçilə bilməz.
Səfər zamanı İran-Azərbaycan münasibətlərində dəyişməyəcək məqamlar barədə danışılacaq. Yəni prezident olaraq kim seçiləcəksə seçilsin əldə olunmuş nəticələr əslində dəyişməz olaraq qalır.
Hazırda sərhəddə gedən proseslərdən də söhbət gedə bilər. Təəssüf ki, sərhəddə yaranmış gərginlik İran və digər ölkələrə təsir göstərir. İranın burada əsas məqsədi isə öz maraqlarını təmin etməkdir. Bu maraqlar da Zəngəzur dəhlizinin açılması ilə bağlıdır.
Ona görə də səfər zamanı bu barədə fikir mübadiləsi aparılacaq. Son vaxtlar kütləvi informasiya vasitələrində İranla bağlı müəyyən narazı fikirlər var idi. Xüsusilə, İran generallarının Ermənistana səfərini qeyd edə bilərik.
Ancaq düşünmürəm ki, bu məsələ müzakirə olunacaq. Ona görə də səfərin əsas məqsədinin regiondakı gərginliklərə aidiyyəti yoxdur”.
