Azərbaycanın Qarabağ bölgəsindəki Rusiya sülhməramlı kontingentinin komandiri, general-leytenant Rüstəm Muradov vəzifəsindən kənarlaşdırılıb. Muradovun yerinə Cənubi Hərbi Dairə komandirinin müavini general-leytenant Aleksey Avdeev təyin ediləcək.
Məlumata görə, A.Avdeevin Xankəndidə iki həftə ərzində işləri təhvil alması baş tutacaq.
Ehtiyatda olan polkovnik Şair Ramaldanov "Sherg.az"a açıqlamasında R.Muradovun vəzifədən kənarlaşdırılması barədə danışıb. Ekspertin sözlərinə görə, onun vəzifədən kənarlaşdırılmasına səbəb fəaliyyəti ilə bağlıdır:
"Çünki bütün hərbi qurumlar kimi Rusiya sülhməramlı kontingentinin də qarşısına konkret vəzifələr qoyulub. Rəhbərliyə yeni gələn şəxsin kimliyindən asılı olmayaraq, həmin şəxs hərbi nizam-intizama əməl etməlidir. Düşünmürəm ki, R.Muradovun vəzifədən kənarlaşdırılması nəyisə dəyişəcək. Bilirik ki, sülhməramlı qüvvələr Rusiyanın nümayəndələridir. Təbii ki, orada müəyyən şəkildə Rusiyanın maraqları var. Lakin rus sülhməramlıları Azərbaycan ərazisində yerləşdiyi üçün ölkəmizin maraqlarına zidd olan davranışlara yol verilməməlidir".
Ş.Ramaldanov qeyd edib ki, rusiyalı sülhməramlılarının bütün vəzifələri, qarşıya qoyulan məqsədlər məhz Azərbaycan tərəfi ilə razılaşdırılır:
"R.Muradovun kənarlaşdırılmasına gəlincə, hərbi sahədə çalışanlar daim bir vəzifədə qalmırlar. Fikrimcə, bizimlə razılaşdırılıb. R.Muradovun yerinə gələn şəxs də əhalinin dinc yaşayışını təmin etməlidir. Düşünmürəm ki, rəhbərliyin dəyişməsi sülhməramlı qüvvələrin iş prinsipini dəyişəcək".
