“Su ehtiyatları ilə bağlı olan problem təsəvvür ediləndən daha ciddidir. İqlim dəyişikliyi həm də yağıntıların azalması ilə müşayiət olunur. Qonşu dövlətlərdən daxil olan çay suları azalır”.
“Sherg.az” xəbər verir ki, bunu sosial şəbəkədə Mətbuat Şurasının sədr müavini Müşfiq Ələsgərli yazıb.
Ekspert qeyd edib ki, paralel olaraq iqtisadiyyatın inkişafı, kənd təsərrüfatı sahələrinin genişlənməsi suya olan tələbatı artırır. Bu baxımdan, ölkədə su mənbələri ilə bağlı yeni situasiya yaranır:
“Ən böyük su mənbəyi - Kür çayı minimal həddə düşüb. Hazırda şirin su ehtiyatlarından səmərəli istifadənin təmin edilməsi üçün tədbirlər görülür. İlk addımlardan biri kimi yeni su anbarlarının tikintisi, şirin su itkisinin qarşısının alınması oldu. İndi isə su mənbələrindən ödənişli istifadə mexanizmi tətbiq edilir. Məqsəd israfçılığın qarşısının alınması, qənaətlə istifadənin təşviq edilməsi, suların mühafizəsinin yaxşılaşdırılması, istifadə edilən suyun uçotunun aparılmasıdır. Proqrama əsasən, su təsərrüfatı qurumları özünümaliyyələşdirmə prinsipi ilə fəaliyyət göstərəcəklər. Yeni qaydalara əsasən, texniki qurğular və avadanlıqlar tətbiq etməklə, su və su təsərrüfatı obyektlərindən, o cümlədən yerüstü və yeraltı təbii su mənbələrindən, su anbarlarından bilavasitə su götürən hüquqi və ya fiziki şəxslər tərəfindən suyun həcminə görə ödənişlər həyata keçiriləcək. Sudan istifadə haqqı onun keyfiyyətindən, təyinatından, su təsərrüfatı obyektlərinin texniki səviyyəsindən asılı olaraq differensiallaşdırılacaq. İstifadəsi hamı üçün mümkün və açıq olan su obyektlərindən fiziki şəxslərin öz ehtiyaclarını təmin etmək məqsədilə istifadəsi yenə də ödənişsiz olacaq”.
