"Separatçılığın bütün təzahürləri, təbliğatlar məhz Xankəndidəki həmin binadan, qarşısındakı meydandan başlamışdı..."
"Qarabağın bütün ərazilərində Azərbaycanın konstitusion quruluşunun təmin olunması, dövlətin nəzarətinin tam təmin olunması böyük və mühüm hadisədir".
Bu barədə "Sherg.az"a açıqlamasında millət vəkili Ceyhun Məmmədov deyib.
Deputat bildirib ki, separatçılığın bütün təzahürləri, təbliğatlar məhz Xankəndidəki həmin binadan, qarşısındakı meydandan başlamışdı:
"Daha sonra bütün Qarabağ ərazisini əhatə etmişdi. Daim ermənilərə qonaqpərvərliyini, mərhəmətini göstərən, onlara öz ərazilərində şərait yaradan Azərbaycana qarşı ermənilər xəyanət etdilər. Bu gün ermənilər həmin xəyanətin, düşmənçiliyin cəzasını çəkilər. Cənab Prezidentin Xankəndinə, Xocavəndə, Xocalıya, Ağdərəyə səfəri, orada Azərbaycan bayrağını ucaltması, çıxışı zamanı verdiyi mesajlar xüsusilə önəm daşıyır. Bu, təkcə Ermənistana yox, onların havadarlarına verilmiş mesajları idi. Dövlət başçısı çıxışında vurğuladı ki, o vaxt bu proseslər Fransada bir məqalənin dərc olunması ilə başladı və sonrakı dövrdə də bütün bu ərazilərdə, bölgədə alovlanmağa başladı".
Parlament üzvü vurğulayıb ki, nəticədə bütün separatizm fəaliyyəti ermənilərin öz başında çatladı:
"Artıq sözügedən ərazilər Azərbaycanın nəzarətindədir. Digər azad etdiyimiz ərazilər kimi bu bölgə də ən qısa zamanda yenidən qurulacaq, tikiləcək və abad ediləcək. Bunun üçün bir sıra zəruri tədbirlər həyata keçirilir. Cənab Prezidentin vurğuladığı kimi bu, Azərbaycan Ordusunun qəhrəmanlığı, xalqımızın birliyi nəticəsində reallaşdı. Bunu həm də dövlət başçısı İlham Əliyevin ilk dəfə prezident seçilməsinin 20 illiyi münasibətilə həyata keçirilmiş mühüm addım kimi qiymətləndirmək olar".
Qeyd edək ki, Prezident və Müzəffər Ali Baş Komandan İlham Əliyev Xankəndi, Ağdərə, Xocalı, Əsgəran qəsəbəsində, Sərsəng su anbarının ərazisində Azərbaycanın üçrəngli Dövlət Bayrağını ucaldıb. Beləliklə, tarixi ədalət bərpa olunub.
