Ermənistan təcrid siyasətini davam etdirməklə bütün regional iqtisadi layihələrdən də kənarda qalacaq
İndi Ermənistan regional əməkdaşlıq və qonşularına qarşı qanunsuz və əsassız ərazi iddiaları arasında seçim etməlidir. Bu barədə Azərbaycanın xarici işlər naziri Ceyhun Bayramov deyib. Nazirin sözlərinə görə, bu məsələdə beynəlxalq ictimaiyyətin də rolu böyük əhəmiyyət kəsb edir: “Ermənistanın revanşist cəhdlərinin hər hansı bir şəkildə dəstəklənməməsi bu bölgənin rifahı və sülhün alternativinin olmamasına dair çağırışların edilməsi olduqca vacibdir”.
Politoloq İlqar Vəlizadə "Sherg.az"a açıqlamasında bildirib ki, təcrübə göstərir ki, Ermənistan Baş naziri Nikol Paşinyan, daha doğrusu, İrəvan hökuməti indiyə kimi öz xoşu ilə heç bir addım atmayıb. Ekspertin sözlərinə görə, baş nazirin bundan sonra da sülh yolunda daha sağlam addımlar atacağı, əməli fəaliyyətə keçəcəyi gözləntisi azdır:
"Müharibədən sonra Ermənistan hökumətinin sülh danışıqları ilə bağlı atdığı bütün addımlar məcburiyyətdən irəli gəlib. Hansısa təzyiqlərdən sonra nisbətən irəliləyişə doğru mövqe sərgiləyiblər. Digər bütün hallarda isə rəsmi Bakının şərtlərindən, tələblərindən qaçıblar, müxtəlif bəhanələrlə sülh danışıqlarından uzaqlaşıblar. Sərhədlərin müəyyənləşməsi ilə bağlı komissiyaların yaradılması, kommunikasiyalar və s. məqamlarda da sırf məcburiyyət qarşısında qaldıqları üçün "fəaliyyət" imitasiyası edirlər. Azərbaycan Ermənistan tərəfinə növbəti ciddi xəbərdarlığını etdi və bir günlük əməliyyatla Qarabağdakı separatizmə son qoyuldu. Şübhə yox ki, İrəvan hakimiyyəti bölgədə rəsmi Bakının diktəsi ilə yaradılmış bu yeni reallığı da qəbul etmək məcburiyyətindədir. Ermənistanın başqa yolu yoxdur". Analitik vurğulayıb ki, hazırda gündəmdəki əsas məsələlərdən biri Zəngəzur dəhlizinin açılmasıdır: "Ancaq Ermənistan bu məsələdə də mümkün qədər vaxtı uzatmağa çalışır. Azərbaycan nə qədər gözləyəcək? Təbii ki, çox gözləmək fikrimiz yoxdur. İran vasitəsilə artıq yol çəkilir. Tehranla müəyyən şərtlər razılaşdırılandan sonra Ermənistan olan-qalan şansını da itirmiş olacaq. Zəngəzur dəhlizi sadəcə nəqliyyat yolu olmayacaq, həm də enerji dəhlizi rolunu oynayacaq. Ermənistan təcrid siyasətini davam etdirməklə regional bütün iqtisadi layihələrdən də kənarda qalacaq. Bunun ziyanını da ermənilər özləri çəkəcək. Ceyhun Bayramov bunları nəzərə alaraq, çağırış edir ki, bəlkə ayıldılar. Sonrakı peşmanlıq fayda verməyəcək".
