"Rusiyanın Azərbaycana silah-sursat satmasının özünə də xeyirləri var”. Bu sözləri "Şərq”ə politoloq Elman Nəsirli Sarkisyanın Moskvaya səfərinin ardından Rusiyanın Azərbaycanla hərbi artilleriya vasitələrinin satışını həyata keçirməsini şərh edərkən deyib. Ekspertin sözlərinə görə, Ermənistan dövləti Rusiyanın bir quberniyasıdır:
"Rusiya ona müxtəlif səviyyədə iqtisadi dəstək də verir. Hətta Sarkisyanın Moskvaya səfərindən sonra qazın qiyməti Rusiya tərəfindən daha 20 dollar ucuzlaşdırıldı və Ermənistana 200 milyon dollar kredit verildi. Bütün bunlara baxmayaraq Ermənistan həmişə həyəcan təbili çalır. Çünki Ermənistanın müttəfiq kimi qəbul etdiyi Rusiya eyni zamanda Azərbaycana da hərbi hissələrlə və bir sıra digər məsələlərlə bağlı çox ciddi dəstək verir. Azərbaycan Rusiyanın çox yaxın partnyorudur. Rusiyanın Azərbaycanla
hərbi alış-verişinin olması Azərbaycanın bölgədəki mövqeyini möhkəmləndirir. Təbii ki, Rusiyanın Azərbaycana hərbi cəhətdən dəstək olmasının digər səbəbi də ölkənin özü ilə bağlıdır. Hazırda dünyada ən gəlirli 3 sahə var. Bunlardan birincisi, silah-sursat satışıdır. ABŞ gün ərzində 50 milyard dollarlıq silah-sursat satışı həyata keçirir. Rusiyada bu satış ABŞ-a nisbətən 3-4 dəfə azdır. Bu baxımdan Rusiyanın Azərbaycanla hərbi texniki sahədə əməkdaşlıq etməsi onun öz maraqlarına da uyğundur. Rusiya gələcəkdə də Azərbaycan ilə silah-sursat alış-verişi həyata keçirəcək”.
Politoloq bildirib ki, Rusiyanın bu addımı daha çox öz maraqlarına xidmət edir və bu sahədə Azərbaycanla əməkdaşlığa səy göstərir: "Azərbaycan da həmçinin Rusiya ilə regiondakı münaqişələrin həlli yolu ilə bağlı əməkdaşlığa maraq göstərir. Biz Rusiya və dünyanın bir sıra qabaqcıl ölkələri ilə hərbi əməkdaşlıq edirik. Bütün bu əməkdaşlığın bir məqsədi daha da güclənmək və torpaqlarımızı düşmən tapdağı altından xilas etməkdir”.
Ayyət Əhməd