"2019-cu il üçün neftin qiyməti ilə bağlı proqnozlar ürəkaçandır”.
Bunu "Sherg.az”a Neft Araşdırmalar Fondunun rəhbəri İlham Şaban bildirib.
Onun sözlərinə görə, neftin qiymətlərində ucuzlaşmalar olsa da, bu o demək deyil ki, 2019-cu ildə neftin qiyməti ilə bağlı narahatlıq doğuracaq bir ssenari olacaq:
"Hazırda 2019-cu ildə "qara qızıl”ın dəyəri ilə bağlı proqnozlarda minumun qiymət kimi 60 dollar göstərilir. Ən optimist qiymət isə 80 dollar olacağı bildirilir. Bütün bu proqnozlar ABŞ tərəfindən verilib. Amma neftin qiyməti ilə bağlı daha real hədd 65 dollar kimi göstərilir. 2019-cu ildə dövlət büdcəsinə neftin orta qiyməti 60 dollar götürülüb.
Yəni hələ ki, neftin qiymətləri ilə bağlı proqnozlar 63-64 dollardır və bu, bazar üçün çox yaxşı dinamikadır. Gələn il bir neçə hərrac "qara qızıl"ın qiyməti 50 dollardan da aşağı düşə bilər. Amma bu orta illik qiymətə təsir edən amil deyil. Lakin OPEK qərarını verdi. Çoxları düşünür ki, OPEK-in bu addımı bazara güclü təsir göstərəcək. Lakin OPEK+ölkələrinin yeni qərarları 2019-cu ilin yanvar ayının 1-dən qüvvəyə minəcək. Və ilk altı ay ərzində neft istehsalı 1.2 milyon barel azalacaq. Amma bu o qədər tez baş tutan proses deyil.
Çox güman ki, məsələ ilə bağlı OPEK-in ilk hesabatı fevral ayının 12-də olacağını bildirirlər. Həmin hesabatda neft istehsalını azaltmaqla bağlı verilən qərara neçə faiz əməl edildiyi məlum olacaq. Daha sonra aprel ayının ortalarındaki hesabatda prosesin tam gedişatı bizlərə məlum olacaq. Eyni zamanda buna bazar adekvat olaraq öz cavabını bildirəcək”.
Qeyd edək ki, OPEC prezidenti, Birləşmiş Ərəb Əmirliklərinin enerji naziri Süheyl əl Məzrui bildirib ki, "OPEC+ ölkələri lazım gəlsə, saziş müddətini artıra, yaxud hətta neft istehsalını daha da azalda bilər. Təşkilatın rəhbəri deyib ki, nəzərdə tutulan hasilat azalması ətraflı şəkildə araşdırılmışdı, lakin səmərəli olmasa, əvvəllər etdiyimiz kimi istədiyimiz vaxt OPEC-in növbədənkənar iclasını çağıra bilərik. OPEC+ formatının müddətini daha altı ay uzatmaq zərurəti yaransa, bunun həyata keçiriləcəyini, hasilatı azaltmaq lazım gəlsə, həmişə müzakirə edib sanballı qərara gəlirik. O, bəzi üzv ölkələrdə hasilatın təbii azalması baş verdiyindən OPEC-in saziş şərtlərini həqiqətən də artıqlaması ilə yerinə yetirə biləcəyini diqqətə çatdırıb.
Kənan Eynuroğlu
