İvanişvili unutmasın...

"Mən erməniləri çox sevirəm və bunu heç vaxt gizlətmirəm”. Bu ifadəni Gürcüstanın baş naziri Bidzina İvanişvili ermənilərin kompakt yaşadığı Axalkalakidə hakim "Gürcü arzusu” partiyasından ölkə prezidentliyinə namizəd Georgi Marqvelaşvilini təqdim edərkən səsləndirib. Erməniləri öz tərəfdarları adlandıran baş nazir onlarla bir arada olmaqdan çox şad olduğunu bildirib: "Biz həqiqətən qardaşıq. Siz bizim kimi Gürcüstan vətəndaşlarısınız. Bura sizin vətəninizdir. Gürcüstanın problemləri var, bizim ərazilərimiz itirilib. Problemlər Ermənistanda da var. Ümid edirəm, birlikdə bu çətinlikləri adlayacağıq”. Gürcü baş nazirinin seçkiqabağı birdən-birə gündəmə gələn "erməni sevgisini” şərh edən "Borçalı” Cəmiyyətinin təsisçisi, Ağsaqqallar Şurasının sədri Eyvaz Borçalı açıqlamanın daha çox siyasi xarakterli olduğunu düşünür: "Siyasi mahiyyət daşısa belə, yüksək postda əyləşən rəsmi adamın bu cür ehtiyatsız və qıcıq yaradacaq açıqlama verməsi yolverilməzdir. Gürcüstanda ermənilərdən çox azərbaycanlılar yaşayır. Onların heysiyyatına toxunmaq olmaz. Erməniləri qaldırıb göyün təpəsinə qoyan İvanişvili unutmasın ki, ölkə daxilində gürcülərin ən qorxulu və ən gizli düşmənləri ermənilərdir. Eyni zamanda Gürcüstan dövlət olaraq Azərbaycana "möhtac”dır. Bu bəyanat İvanişvilinin içindəki gizli erməni sevgisindən də qaynaqlana bilər, Rusiya faktorundan da. Amma istənilən halda baş nazirin çıxışı çox uğursuz və ziyanlıdır”.