Mikayıl Müşfiqin Bakıdakı büstü götürülüb. APA-nın məlumatına görə, büst Mükayıl Müşfiqin adını daşıyan parkda yerləşirdi. Büstün "Azəravtoyolservis” tərəfindən götürüldüyü məlum olub.
"Mədəni İrsin Qorunması, İnkişafı və Bərpası üzrə Dövlət Xidməti”nin rəisi Zakir Sultanov APA-ya bildirib ki, "Azəravtoyolservis” məsələ ilə bağlı onlarla razılaşdırma aparmayıb: "Bizdə bu haqda məlumat olmayıb. Mən "Azəravtoyol” servislə danışdım, dedilər, büst dağıdılmayıb, sadəcə, götürülüb və onların bazasında saxlanılır. Hazırda bu məsələni araşdırırıq ki, həqiqəti üzə çıxaraq”.
"Azəravtoyolservis” ASC-nin mətbuat xidmətinin rəhbəri Anar Nəcəfli APA-ya bildirib ki, büstün dağıdılması haqqında yazılanlar həqiqətə uyğun deyil: "Büst dağıdılmayıb. Sadəcə, Sovetskidə yenidənqurma və genişləndirmə işləri aparılır. Mikayıl Müşfiqin büstü də həmin ərazidə yerləşirdi. Büst müvəqqəti olaraq götürülüb, təmir işləri başa çatandan sonra yenidən yerinə qaytarılacaq”.
