"Donald Tramp deyir ki, biz Rusiya ilə yenidən çox yaxşı münasibətdə olmaq fikrindəyik”.
Bunu Sherg.az-a ABŞ və Rusiyanın Suriyada hərbçilər arasında münaqişələrin qarşısının alınması mexanizminin bərpa edilməsinə münasibət bildirərkən politoloq Elxan Mehdiyev deyib. O bildirib ki, Suriyada Amerika və Rusiya qüvvələri arasında təyyarələrin uçuşu, hansı ərazini bombardman etmək və ya etməməklə bağlı mövcud olan koordinasiya dayandı:
"Suriyanı bombalayandan sonra ruslar Amerika hökumətinin dayandığını elan etdilər. İndi dövlət katibinin səfərindən sonra bu bərpa edildi.
Amerika hökuməti də etiraf edir ki, Suriyadakı savaşa daxil olmaq məqsədi daşımırlar, onlar yalnız kimyəvi silah istifadə edildiyinə görə cəzalandırırlar. Onların məramı budur. Bu baxımdan Rusiyanın məsələyə belə sərt reaksiya verməsi də anlaşılan deyil. Çünki sanki "Suriya Rusiyanın bir əyalətidir” - təəssüratı bağışlayır. Rusiya ilə Amerika arasında psixoloji gərginlikdən başqa ciddi alovlanan problem yoxdur. Buna baxmayaraq, Rusiya ilə Amerika arasında Ukrayna məsələsinə görə, ziddiyyətlər qalır. Sadəcə, Rusiyanın Amerika dövlətindən yeni prezidentdə gözləntiləri böyük idi. Donald Tramp seçki kampaniyası vaxtı Rusiya ilə münasibətləri normal hala, müttəfiqliyə çevirəcəyini bildirirdi. Amma o hakimiyyətə gələndən sonra Rusiya ilə onun administrasiyasının adamlarının bütün əlaqələri ilə bağlı araşdırmalara başlanıb. Rusiyaya qarşı psixoloji gərginlik, anti-mühit yaradılır. Bu da Rusiyada bir xəyal qırıqlığına gətirib çıxartdı. Rusiyanın gözləntiləri heçə enib. O da əvvəlki prezident Barak Obama dövründəki gərginliyin yenidən bərpa olunmasına gətirib çıxarıb. Çünki D. Tramp hakimiyyətə gəldikdə Rusiya gərginliyə pauza qoymuşdu. Amma indi yenidən həmin dövrə qayıdıb”.
Qeyd edək ki, ABŞ Dövlət Departamentinin nümayəndəsi Mark Toner "onun nə dərəcədə dəyişdiyini deyə bilmərəm, lakin, mənim bildiyimə görə, o qüvvədədir” –deyə əlavə edib.
Aysel Aslan
