"Dağlıq Qarabağ münaqişəsi ilə bağlı beynəlxalq hüquqa uyğun mövqe nümayiş etdirən böyük dövlətlər və beynəlxalq təşkilatlar işğalçı ölkədən BMT-nin qətnamələrinə və digər hüquqi aktlara riayət etməsini tələb etməlidir”.
Bunu "Sherg.az”a açıqlamasında politoloq Nəzakət Məmmədova deyib.
Politoloq bildirib ki, bunun reallaşması mümkündür və bu istiqamətdə səslənən bəyanatlar, aydın şəkildə nümayiş etdirilən mövqelər əsassız deyil:
"Qərb ölkələri tərəfindən verilən bəyanatlar münaqişənin nizamlanmasının normativ-hüquqi bazasınín təkmilləşdirilməsinə xidmət edir. Təkcə bu ilin ikinci yarısında biz Avropa Birliyi və NATO-nun Azərbaycanın ərazi bütövlüyünü, suverenliyini dəstəkləyən, münaqişələrin dövlətlərin sərhədlərinin toxunulmazlığı prinsipi çərçivəsində həllinə tərəfdar olduğunu bəyan edən yanaşmasını müşahidə etdik.
Habelə, Almaniya kansleri və hökumətinin, ABŞ Dövlət katibi müavininin köməkçisi Kentin, ABŞ-ın Ermənistandakı səfiri Millzin də Azərbaycanın işğal edilmiş torpaqlarının qaytarılmasının zərurəti ilə bağlı mövqeyini gördük.
Üstəlik, Dövlət Departamenti Dağlıq Qarabağa getməməklə bağlı vətəndaşlarına xəbərdarlıq etdi. ABŞ prezidentinin milli təhlükəsizlik müsaviri Con Bolton regiona səfərə gəlir. Bütün bunların fonunda hazırkı diplomatik cəbhədəki status-kvo Azərbaycanın üstünlüyü şəraitindədir”.
Analitikin fikrincə, Ermənistandakı seçkilər və regionda gedən bir sıra digər proseslərin gedişatı Dağlıq Qarabağ məsələsinin ədalətli həllinə təsir göstərə bilər:
"Hər bir halda işğalçının tez, ya gec ən azından işğal etdiyi torpaqlardan çəkilməsi onun qarşısında qoyulmalı olan ən təbii tələbdir. Əgər böyük dövlətlər öz regional geosiyasi ambisiyalarına işğal olunmuş torpaqların azad olunması çalarını da əlavə etsələr, biz onların verdikləri bəyanatdan əməli işə keçdiklərinin şahidi ola bilərik”.
İsmayıl
