"Ümumiyyətlə, xaricdən Azərbaycanın maraqları əleyhinə fəaliyyət göstərən qüvvələr təkcə terroru silah, xəncərlə deyil, həm də internet, yaratdıqları ayrı-ayrı saytlar və sosial şəbəkələr üzərindən reallaşdırmağa çalışırlar”. Bu fikirləri SİA-ya açıqlamasında Azərbaycan Mətbuat Şurası idarə heyətinin üzvü, "Şərq" qəzetinin baş redaktoru Akif Aşırlı deyib.
Baş redaktor bildirib ki, bu cür mərkəzlərin məqsədləri Azərbaycanda qarşıdurma, vətəndaş itaətsizliyi yaratmaq, dövlətimizin əsaslarını sarsıtmaq, Konstitusiyamızda nəzərdə tutulan dövlət quruluşunun dəyişdirilməsinə nail olmaqdır: "Bu təxribatçı, milli-maraqlarımızın əleyhinə olan qüvvələr odlu silahlardan deyil, sözdən silah kimi istifadə edirlər. Bir neçə sayt var ki, onlar son günlər Azərbaycanın əleyhinə çağırışlar səsləndirir, xalqımızı dövlətçilik əleyhinə çıxmağa səsləyəcək şüaurlar səsləndirirlər. Onların mərkəzləri xaricdədir. Lakin ölkəmizdə də onlara dəstək verən insanlar var”.
Xalqımızın dəfələrlə təxribat xarakterli çağırışların qarşısını aldığını xüsusi vurğulayan A.Aşırlı deyib ki, Azərbaycan xalqı bu cür çağırışlara inanmır:
"Bunun əsas göstəricisi Gəncə hadisələrində oldu. Xalq onları deyil, müstəqilliyimizi, dövlətçiliyimizi dəstəkləyir”.
Baş redaktor qeyd edib ki, bu cür saytların hansı ölkələrdə fəaliyyət göstərdiklərini müəyyənləşdirmək lazımdır:
"Bizə düşmən olan ölkələr var və onların diasporu xaricdə kifayət qədər fəallıq göstərirlər. Lakin ilk növbədə bu sayların arxasında dayana qüvvənin kimliyi müəyyən olunmalıdır. Daha sonra həmin ölkələrin səfirləri, hökumət orqanları çərçivəsində iş aparmaq mümkündür. İnformasiya texnologiyalarını mükəmməl bilən insanlar bu saytların Azərbaycana çıxışına filtr qoymaq imkanlarını müzakirə etməlidirlər. Sosial şəbəkələrdə vəziyyət fərqli olsa da, Azərbaycana qarşı yönələn saytlara məhdudiyyət qoymaq mümkündür”.
