"Aprel döyüşləri Azərbaycanın zəfər tarixidir”.
Bu barədə "Sherg.az”a millət vəkili Aydın Hüseynov deyib.
Millət vəkilinin sözlərinə görə, Azərbaycan ordusu bu döyüşdə ermənilərə öz gücünü nümayiş etdirdi və ermənilərin "Güclü Ermənistan ordusu” mifini məhv etdi:
"1992-ci ildən etibarən torpaqlarımız işğal ediləndən sonra ermənilərdə belə bir fikir formalaşmışdı ki, Azərbaycan Ordusu ermənilərə qarşı döyüşmək iqtidarında deyil. Amma 2016-cı ilin aprel döyüşlərində Azərbaycan əsgəri ermənilərin bu fikrini darmadağın etdi və onlara Azərbaycanın gücünü göstərdi.
Aprel döyüşlərində Azərbaycan əsgəri işğal altında olan bir neçə yüksəkliyi qısa müddətdə ermənilərdən azad etməklə bütün dünyaya sübut etdi ki, Azərbaycan istənilən vaxt torpaqlarını işğaldan azad etməyə qadirdir, lakin biz münaqişənin sülh yolu ilə həllini istəyirik.
Aprel döyüşləri Azərbaycan ordusunun gücünü və əzmini göstərdi, Azərbaycan əsgərinin vətənpərvərliyini bir daha sübuta yetirdi. Azərbaycan dövlətinin Qarabağ məsələsində prinsipial mövqeyini bir daha nümayiş etdirdi. Aprel döyüşləri Azərbaycan tarixinə şanlı bir səhifə yazdı. Bu döyüşlərin nəticəsi dünyaya çatdırdı ki, Azərbaycan öz torpaqlarında ikinci erməni dövlətinin yaradılmasına heç vaxt imkan verməyəcək və istənilən halda öz torpaqlarını azad edəcək".
Qeyd edək ki, bu gün Silahlı Qüvvələrin Ali Baş Komandanı İlham Əliyev aprelin 2-də Müdafiə Nazirliyinin Xüsusi Təyinatlı Qüvvələrinin N saylı hərbi hissəsində hərbçilərlə görüşdə çıxış edib. Ölkə başçısının sözlərinə görə, aprel döyüşləri bütün dünyaya göstərdi ki, Azərbaycan Ordusu bu gün ən yüksək keyfiyyətlərə malikdir və istənilən anda istənilən vəzifəni icra edə bilər.
Ayyət Əhməd
