"Azərbaycanın daha bir peykinin orbitə buraxılması çox böyük tarixi hadisədir”.
Bunu "Sherg.az”a açıqlamasında tanınmış jurnalist, Mətbuat Şurasının İdarə Heyətinin üzvü Azər Həsrət deyib.
Ekspertin sözlərinə görə, ölkəmiz dünya kosmos ölkələri sırasında yer almaqla, əslində öz qüdrətini sübut etmişdi. Amma belə qısa müddət ərzində 3-cü peyki orbitə göndərməklə bunun təsadüfi olmadığını göstərdi:
"Əlbəttə, 3-cü peyk bizi istəməyənləri, ilk növbədə erməniləri və onlarla bərabər "azərbaycanlı” olub Azərbaycana düşmən kəsilənləri narahat edir. Ona görə də bəzi ünsürlər böyük hadisəni gözdən salmağa çalışırlar. Amma bir şeyi unudurlar ki, artıq onların dövrü keçib”.
A.Həsrət bildirib ki, Azərbaycan daha bir peyklə kosmosda təmsil olunmaqla öz təhlükəsizliyini möhkəmləndirdi: "Eyni zamanda o seqmentdə xidmətlərin təqdim edilməsində əlavə imkanlar qazandı. Bir Azərbaycan vətəndaşı olaraq ölkəmlə qürur duyuram”.
Qeyd edək ki, Azərbaycanın "Azerspace-2” peyki Fransa Qvianasında yerləşən Qviana Kosmos Mərkəzindəki ELA-3 buraxılış platformasından orbitə buraxılıb. Peyk Fransanın "Arianespace” şirkətinə məxsus "Ariane 5” daşıyıcı raketi ilə orbitə buraxılıb və startdan təqribən 42 dəqiqə sonra raketin gövdəsindən uğurla ayrılıb. "Azerspace-2” peyki hələ orbitə buraxılmamış artıq onun tutumlarının 46 faizi artıq dünyanın peyk xidmətləri üzrə aparıcı şirkəti olan "İntelsat” şirkətinə satılıb. Bu müqavilə üzrə ödənişlər layihə dəyəri və maliyyələşmə xərclərinin 60 faizinin geri qaytarılmasını təmin edəcək. Hazırda peykin qalan tutumlarının satışı ilə əlaqədar digər ölkələrlə aktiv biznes danışıqları aparılır.
İsmayıl
