"Azərbaycan Dəmir Yolları (ADY) tez-tez ziyanla işlədiyini bildirən, amma dövlətdən dotasiya alan, böyük kredit borcları olan dövlət qurumlarından biridir”.
Bunu Sherg.az-a ölkədaxili sərnişin və sürət qatarlarında gediş haqqının artırılmasının səbəblərini izah edərkən iqtisadçı ekspert Natiq Cəfərli deyib.
O diqqətə çatdırıb ki, son zamanlar qurumun xarici borcların qaytarılması ilə bağlı problemlər yaşaması ilə bağlı ciddi məlumatlar yayıldı:
"Xarici borcların geri qaytarılmasına dair gecikdirmələr baş verib. Belə ki, ödəniş may ayında edilməli olduğu halda ADY bunu edə bilməyib. Çox güman ki, qiymət artımının səbəblərindən biri də əlavə vəsait əldə edərək ölkə daxilində və xaricdə yaranmış borclarla bağlı problemin həllində müəyyən maliyyə vəsaiti əldə etməkdir. Bunun iqtisadi əsasının olduğunu düşünmürəm. Çünki nə elektrik tariflərində, nə də sərnişindaşımanın maya dəyərini təşkil edən başqa sahələrdə nəzərəçarpan artım olub ki, ciddi gedişhaqqı artımına səbəb olsun. Ona görə, düşünürəm ki, ADY-nin qiyməti artırmasının səbəbi öz maliyyə yükünün bir hissəsini vətəndaşın çiyninə qoymaqla həll etməyə çalışmasıdır”.
Qeyd edək ki, gediş haqlarının tənzimlənməsi üçün iyulun 15-dən etibarən ölkədaxili sərnişin və sürət qatarlarında baza tarifinə kupe və plaskart tipli vaqonlarda aşağı yerlərə 1,2 əmsalı tətbiq ediləcək. Bu isə hazırkı qiymətlərin 20% artırılması deməkdir.
Aysel Aslan
