"Azərbaycan və Ermənistan prezidentlərinin görüşündən sonra razılıq ələd olunubsa, Azərbaycan Xarici İşlər Nazirliyi (XİN) rəsmi şəkildə məlumat verməlidir”.
Bunu "Sherg.az”a Rusiya XİN rəsmisi Maria Zaxarovanın "Bakı və İrəvanı razılaşdırılmamış məsələlərin düyününün açılmasına konstruktiv yanaşmağa çağırırıq" iddiasını dəyərləndirərkən sabiq xarici işlər naziri Tofiq Zülfüqarov söyləyib.
O bildirib ki, görüşdən sonra razılaşmalar olubsa, indi diplomatik gərginliyin artması ziddiyətlidir:
"Cəbhədə də vəziyyət gərgin olaraq qalır. 2 gün əvvəl daha bir əsgərimiz şəhid oldu. Razılaşmanın əldə edilməsi fonunda ermənilərin cəbhə xəttində təxribat törətməsi anlaşılan deyil. Buna görə, şübhələr yaranır ki, Rusiya hansı razılaşmadan danışır ?
Bütün bu məsələlər ətrafında Azərbaycan XİN-nin geniş şərh bildirməsi vacibdir”.
Qeyd edək ki, Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycan və Ermənistan prezidentlərinin Cenevrə görüşündə danışıqlar prosesini intensivləşdirmək üçün tədbirlər görmək və təmas xətti boyunca gərginliyi azaltmaq üçün əlavə addımlar atmağa dair razılaşmasını alqışladığını bəyan edib. Qurum sözcüsü əlavə edib ki, Rusiya ATƏT-in Minsk qrupunun Dağlıq Qarabağ münaqişəsinin həlli istiqamətində səylərini dəstəkləyir.
Aysel Aslan
