"Bu, beynəlxalq təşkilatlar tərəfindən verilən ilk hesabat deyil. Azərbaycan sosial dövlətdir və büdcənin 1/3-i sosial sahələrə ayrılır”.
Bunu "Sherg.az”a açıqlamasında "Altay” Sosial-İqtisadi Araşdırmalar Mərkəzinin rəhbəri Elçin Bayramlı deyib.
İqtisadçının sözlərinə görə, Azərbaycanda həm dövlət, həm də qeyri-dövlət fondları tərəfindən çoxsaylı sosial layihələr həyata keçirilir ki, bu da əhalinin yaşayış imkanlarını yüksəldir:
"Əhalinin aztəminatlı hissəsinə sosial yardımların, iş qurmaq üçün müvafiq vəsaitlərin, hətta bəzi imtiyazlı təbəqələrə pulsuz mənzillərin verilməsi halı çox az ölkədə var.
Respublikamız əhalinin elektrik enerjisi, təbii qaz və su ilə təminatı sahəsində dünyada ilk yerlərdən birini tutur. Ən ucqar kəndlərə belə fasiləsiz elektrik verilir ki, buna da heç də bütün ölkələrdə nail olunmayıb. Son illərdə aparılmış iqtisadi islahatlar, ölkəmizdə biznesin rəqabətqabiliyyətini artırıb. Korrupsiyaya qarşı mübarizə güclənib. Bürokratiya aradan qaldırılır. Nəticə özünü qeyri-neft ÜDM-in, dövlət büdcəsinin, ixracın artımında büruzə verir”.
E.Bayramlı bəyan edib ki, dünyada iqtisadi böhran müşahidə olunduğu, qonşu ölkələrdə davamlı inflyasiya prosesinin getdiyi, milli valyutaların ucuzlaşdığı, işsizliyin və sosial vəziyyətin ağırlaşdığı bir situasiyada belə uğurlara nail olmaq çox müsbət haldır:
"Lakin cənab Prezidentin dediyi kimi, hələ görüləsi çox işlər var. Sahibkarlara maneə yaradanlar cəzalandırılmalıdır. Gömrük sistemində neqativ hallar tam aradan qaldırılmalı, bəzi sahələrdə müşahidə olunan monopoliyanın qarşısı alınmalı, sənədləşmə bürokratiyası ləğv edilməlidir. İslahatlar davam edir. Tezliklə ölkəmizin daha yüksək yerlərdə olacağına şübhə etmirəm”.
Qeyd edək ki, Dünya İqtisadi Forumunun Qlobal Rəqabətlilik Hesabatı tamamilə yeni metodologiya əsasında ictimaiyyətə təqdim edilib. Hesabatın 12 əsas sütun indikatorundan 7-si üzrə ölkəmizin mövqeləri əhəmiyyətli dərəcədə yaxşılaşıb.
Qlobal trendlər nəzərə alınmaqla, hesabatın metodologiyasında dəyişikliklər o qədər dərin və əhatəli olub ki, Dünya İqtisadi Forumu bu metodologiyanı yeni nəsil "4.0” kimi təqdim edib. Bu isə onu deməyə əsas verir ki, "Qlobal Rəqabətlilik Hesabatı-2018/2019” yeni dövrün ilk hesabatıdır.
İsmayıl
