Dünya Bankı Azərbaycanda 2018-2020-ci illər üçün inflyasiya ilə bağlı proqnozunu açıqlayıb. Dünya Bankının "Kriptovalyutalar və Blokçeyn texnologiyaları: Avropa və Mərkəzi Asiya Regionu üzrə İqtisadi Məruzə (Cryptocurrencies and Blockchain: Europe and Central Asia Economic Update)” adlı yeni hesabatında qeyd olunub ki, bu il Azərbaycanda inflyasiya 6,4 faiz təşkil edəcək.
"2019-cu ildə Azərbaycanda qiymət artımı 4,2 faiz, 2020-ci ildə isə 3,9 faiz olacaq”, - deyə hesabatda vurğulanıb.
İqtisadçı-ekspert Fuad İbrahimov "Şərq”ə açıqlamasında Dünya Bankının Azərbaycanda inflyasiyanın azalması haqqında hesabatına münasibət bildirib.
Onun sözlərinə görə, son on ildə inflyasiya ilə bağlı verilən proqnozların heç biri düz çıxmayıb: "Bu barədə istər Azərbaycan Mərkəzi Bankının, istərsə də bununla məşğul olan qurumların verdikləri proqnozlar olsun, sonda doğru olmayıb. Dünya Bankının Reytinq komissiyasının müəyyən etdiyi bu proqnozun isə əsası var. Bu məlumat reallığı əks etdirə bilər. Biz bunun üçün bazar münasibətlərində şəffaflığı və ardıcıllığı pozmamalıyıq.
Verilən sərəncamları, qanunları vaxtında yerinə yetirib, onları hərəkətə gətirsək, şübəsiz ki, bu proqnoz həyata keçirilə bilər. Az miqyasda xətalar istisna olmaqla, bu statistik göstəricilər reallığa oxşayır.
Çünki bizim bunu həyata keçirməyə gücümüz var. Ölkəmizin zəngin təbii ehtiyatlarını səmərəli şəkildə istifadə etsək, bu rəqəmləri gerçəkləşdirə bilərik. İqtisadçı kimi onu deyə bilərəm ki, son on ildə bu cür verilən proqnozların heç biri sonda düz gəlməyib. Bəzən bir rəqəmli inflyasiyadan danışdığımız halda iki rəqəmli inflyasiya ilə üz-üzə qalmışıq.
Bütün bu hallar nisbətən insanda şübhə yaradır. Amma verilən proqnoza hörmətlə yanaşmalıyıq. Hər halda bu sahənin tədqiqatçıları verilən proqnozun üzərində işləyib. Görünür onlar hansısa mövcud faktlara əsaslanaraq bu inflyasiya göstəricilərini açıqlayıblar. Ümid edək ki, bu statistik göstəricilər düz çıxsın”.
Kənan Eynuroğlu
