"Magistratura təhsili əslində mənasız deyil, vacib proseduradır”.
Bunu Sherg.az-a Azvision.az saytının baş redaktoru Vüsal Məmmədovun öz məqaləsində magistratura təhsilini mənasız adlandırmasına münasibət bildirərkən Azərbaycan Avropa Hərəkatının prezidenti, gənc fəal Ramin Hacılı deyib.
O bildirib ki, dünya praktikasına uyğun olaraq magistratura insanın elmə daha yaxşı yiyələnməsi deməkdir:
"Ona görə bunu boş saymaq olmaz. Azərbaycanda isə magistratura təhsilini boş və mənasız edən səbəb odur ki, magistraturada verilən bilik daha fundamental xarakter daşımır. Çox insan magistraturanı sadəcə diplom almaq, yaxud vəzifəsini artırmaq üçün oxuyur.
Bu mənada Vüsal Məmmədov doğru qeyd edib. Magistraturada oxuyanların əksəriyyəti haradasa işləyirlər və magistraturanı yola verirlər, hətta dərsə getmirlər. Magistraturanı iki tip insanlar oxuyur. Biri elmi sahədə fəaliyyət göstərmək istəyənlər, digəri isə öz peşəsini artırmaq istəyənlərdir.
Təəssüf ki, Azərbaycanda elmin arxasınca getmək istəyən şəxslərin sayı çox azdır. Elmi işlə məşğul olmaqla elm arxasınca getməklə böyük gəlir əldə etməyəcəklərini düşünürlər. Magistratura oxumaq istəyənlər də bu diplomu öz prestijini artırmaq üçün alırlar”.
Ayyət Əhməd
