Ali məktəbləri birləşdirməkdənsə, bir çoxlarını ləğv etmək məqbuldur
Millət vəkili Fazil Mustafa parlamentin iclasında Azərbaycanda ali məktəblərin sayının azaldılması təklifi ilə çıxış edib. O qeyd edib ki, universitetlərin çoxunu birləşdirmək lazımdır: "Azərbaycanda bu qədər ali məktəbə, universitetə nə ehtiyac var? Əgər bu ali məktəblər, sadəcə diplom almaq, diplom vermək üçün olacaqsa, o zaman nə təhsildən, nə də savaddan danışmağa dəyər. Bunlara son qoyulmalıdır”.
Təhsil eksperti Nabatəli Qulamoğlu millət vəkilinin fikrinə fərqli yanaşır. O, «Şərq»ə açıqlamasında bildirib ki, ali məktəbləri birləşdirməkdənsə, bir çoxlarını ləğv etmək məqbuldur. Çünki özəl ali məktəblərin 90 faizinin varlığı ilə yoxluğu bilinmir: «Həmin təhsil ocaqları mənasız yerə fəaliyyət göstərirlər. Onların işi camaatı "soymaq”dan, boş yerə təhsil haqqı almaqdan ibarətdir.
Ona görə də belə məktəbləri yenidən akreditasiyadan keçirmək yox, birdəfəlik ləğv etmək lazımdır”.
"İki özəl ali məktəbi necə birləşdirmək olar?” sualı verən ekspert vurğulayıb ki, hər təhsil ocağının təsisçiləri ayrı-ayrı adamlardır: "Bəlkə heç onlar birləşdirilməsini istəmir».
Ekspertin fikrincə, özəl ali məktəbin birini sıradan çıxardıqda, başqa bir universitet bu sektoru monopoliyasına çevirir: "Hər kəs dövlət ali məktəblərində təhsil almaq istəyir. Dövlət məktəbləri də hər kəsi qəbul etmək gücündə deyil. Ona görə də hesab edirəm ki, özəl universitetlərin formatı dəyişdirilməlidir. Bacarıqlı təsisçilər üçün meydan açmaq lazımdır. Universiteti idarə edə bilən, yüksək təhsil verə bilən pedaqoji kollektiv formalaşmasına imkan yaradılmalıdır. Bundan sonra oradakı müəllimlər də gördüyü işin müqabilində məvacib almalıdırlar. Faktiki olaraq mövcud özəl universitetlərin 90 faizi fəaliyyət göstərmir.
Və yaxud da keyfiyyətsiz təhsil verirlər”. Ekspertin qənaətincə, özəl ali məktəblərin yenidən ciddi şəkildə akreditasiyası aparılmalıdır: "Tələblərə uyğun olanlar qeydiyyatdan keçirilməlidirlər. Bundan sonra onların yaxşı təhsil vermələri üçün şərait yaradılmalıdır, dövlət tərəfindən güzəştli kreditlər verməlidir. Dərs keçmək üçün normal korpusla təmin edilməlidirlər. Sonra isə fəaliyyətlərinin hesabatı istənilməlidir. Əgər bu addım atılmasa, heç cür inkişaf olmayacaq”.
İlahə
