"Bakı-Tbilisi-Qars (BTQ) dəmir yolu layihəsinin əsas donoru və idarəedicisi Azərbaycan oldu. Bu, ölkəmizin regionda siyasi çəkisinin artmasına xidmət etdi”.
Bunu "Sherg.az”a BTQ-nin iqtisadi - siyasi əhəmiyyətindən danışarkən iqtisadçı - ekspert Natiq Cəfərli deyib.
O bildirib ki, bu, həm region ölkələri ilə daha sıx əməkdaşlığa, həm də Azərbaycanın Şərq-Qərb dəhlizində mühüm halqaya çevrilməsində mühüm rolu olacaq:
"BTQ-nin iqtisadi səmərəsinə gəldikdə isə təbii ki, ilk illərdə daha çox yük cəlb etmək üçün çalışmaq lazım olacaq. Bununla alternativ marşrutlardan zaman etibarı ilə daha sürətli keçid təmin ediləcək. Nəticədə daha yaxşı tarif siyasəti yürüdülməsinə ehtiyac var. Bunun üçün Azərbaycan, Gürcüstan və Türkiyə artıq danışıqlar aparır. Əgər razılaşma olacaqsa, bu, doğru qərar kimi dəyərləndirilməlidir. Çünki vahid tarif sistemi olsa, daşımaları həyata keçirən iş adamları üçün daha rahat hala gələ bilər.
İlkin mərhələdə isə BTQ region ölkələrinin yükdaşımalarında böyük rol oynayacaq. Türkiyə ilə Azərbaycan arasında avtomobil yolu ilə kifayət qədər böyük həcmdə yük dövriyyəsi, ticarət əlaqələri var. Dəmir yolunun istifadəsi ilə avtomobil yük daşımalarının böyük hissəsi dəmir yolu ilə daşınaraq, mal və xidmətlərin maddi dəyərini aşağı salacaq. Nəticədə Türkiyə məhsullarının Azərbaycanda daha ucuz olmasına, yerli məhsulların isə daha rahat şəkildə Türkiyəyə daşınmasına səbəb olacaq. Bu, regional anlamda, Türkiyə, Azərbaycan və Gürcüstan arasında ticarət dövriyyəsinin artmasına kifayət qədər töhfə verəcək layihədir.
Beynəlxalq aləmdə isə rəqiblərdən üstün olmaq üçün, daha çevik, sürətli keçid və daha cəlbedici tarif siyasəti aparsaq ildə 5-7 milyon ton yükün Şərqdən-Avropaya və əksinə daşınması mümkündür.
Bu isə ölkə büdcəsinə əlavə dividentlər gətirəcək. Amma qeyd etməliyik ki, layihənin ilk illərdə böyük gəlir gətirəcəyini düşünmək düzgün olmaz. Bu orta və uzun müddətli layihədir. Bir necə ildən sonra BTQ-nin gəlirliyi önə çıxa bilər”.
Qeyd edək ki, ötən gün Bakı-Tbilisi-Qars dəmir yolunun açılışı münasibətilə Bakı Beynəlxalq Dəniz Ticarət Limanında təntənəli mərasim keçirilib.
Aysel Aslan
