"Dəmir yolu xəttinin keçdiyi bölgələr də iqtisadi inkişaf dövrünü yaşayacaqlar”"Bakı-Tbilisi-Qars” dəmir yolu Transxəzər Beynəlxalq Nəqliyyat Marşrutunun potensialını xeyli gücləndirəcək”. Bu fikri Qazaxıstanın Azərbaycandakı səfiri Beybit İsabayev deyib. Səfirin sözlərinə görə, Bakı-Tbilisi-Qars təkcə Azərbaycan, Gürcüstan və Türkiyənin deyil, həm də İpək yolu üzərində Asiya və Avropanı birləşdirən bütün ölkələrin nəqliyyat-tranzit əməkdaşlığının inkişafına təkan verəcək irimiqyaslı layihədir.
Diplomat vurğulayıb ki, Bakı-Tbilisi-Qars dəmir yolunda Qazaxıstanın 10 teplovozu istifadə ediləcək: "2020-ci ilədək Qazaxıstan bu layihə üçün Azərbaycanı 40 yükdaşıma elektrovozu ilə təmin edəcək. BTQ dəmir yolu ilə hərəkət edəcək ikinci yük qatarını hazırlamağa başlamışıq. Həmin qatar Rumıniyaya çatdırılması nəzərdə tutulan kömürlə yüklənəcək”. İqtisadçılar noyabrın sonlarında istifadəyə veriləcək Bakı-Tbilisi-Qars dəmir yolu xəttinin perspektivini yüksək dəyərləndiriblər. Ekspertlərə görə, dəmir yolu xətti tək region üçün deyil, Avropa və Asiya üçün ən mühüm layihələrdən biridir. Bu marşrut ölkələri təkcə iqtisadi cəhətdən deyil, digər sahələrdə də biri-birinə bağlayacaq. Dəmir yolu xəttinin Azərbaycan üçün böyük iqtisadi səmərə verəcəyi iddia edilir.
Layihə barədə "Şərq”ə danışan iqtisadçı-ekspert Fuad İbrahimov dəmir yolu xəttinin istifadəsindən sonra ölkəmizin yüksək gəlir əldə edəcəyini deyib.
Ekspert bildirib ki, dəmir yolu xətti nəzərdə tutulduğu vaxtda yekunlaşmasa da, yaxın günlərdə tam həcmdə istifadəyə veriləcək:
"Layihə siyasi və iqtisadi cəhətdən çox əlverişlidir. Çünki bu xətt Çin və Avropanı birləşdirən qədim "İpək Yol”unun üzərində yerləşir. Geostrateji baxımdan layihənin alternativi yoxdur. Xüsusən, şimal qonşumuz Rusiyanın həyata keçirdiyi siyasəti nəzərə alsaq, marşrutun önəmi daha yaxşı bəlli olar. Məlumdur ki, Rusiya həm Qərblə, həm də bir çox qonşuları ilə normal münasibət saxlamır. Bu da imkan verir ki, Şərqlə Qərbin iqtisadi əlaqəsində Azərbaycan mühüm rol oynasın”.
F.İbrahimovun sözlərinə görə, müstəqillik dövründə Azərbaycan iki böyük layihə reallaşdırıb. Birincisi, Bakı-Tbilisi-Ceyhan neft boru kəməri, ikincisi isə Bakı-Tbilisi-Ərzurum qaz kəməridir:
"Xatırlayırsızsa, bu layihələr gündəmə gələndə bəzi qonşu dövlətlər və qərəzli siyasətçilər rişxənd etdilər. Demək olar ki, əksəriyyət layihələrin nə vaxtsa başa çatacağına inanmırdılar. Ancaq ortaya qoyulan qətiyyətli siyasi iradə mühüm layihələrin həyata keçirilməsini reallaşdırdı.
İndinin özündə belə Azərbaycan dövləti sözügedən kəmərlərdən yüksək mənfəət götürür. Əminəm ki, BTQ dəmir yolunun istifadəsindən sonra gəlirimiz daha da yüksələcək. Həmçinin, dəmir yolu xəttinin keçdiyi bölgələr də iqtisadi inkişaf dövrünü yaşayacaqlar”.
İsmayıl
