Natəvan Dəmirçioğlunun Bakı Slavyan Universitetində akademik Zərifə Əliyevaya həsr olunmuş açıq mühazirə dərsi maraqla qarşılanıb.
"Sherg.az" xəbər verir ki, aprel ayında anadan olduğu gün geniş miqyasda qeyd edilən akademik Zərifə Əliyeva Bakı Slavyan Universitetində də yad edilib. BSU Məktəbəqədər təlim-tərbiyə və ibtidai təhsil fakültəsinin İbtidai təhsil kafedrasının "Auditoriya+” layihəsi çərçivəsində böyük oftalmoloq-alim, akademik Zərifə Əliyevanın anadan olmasının 96-cı ildönümünə həsr olunmuş tədbir keçirilib.
Tədbirin qonağı görkəmli yazıçı-publisist, filologiya üzrə fəlsəfə doktoru Natəvan Dəmirçioğlunun "Taleyi və şəxsiyyəti işıqlı bir xanım - akademik Zərifə Əliyeva” adlı mühazirəsi maraqla dinlənilib. Qayğıkeş ana, vəfalı ömür-gün yoldaşı, intellektual keyfiyyətləri özündə birləşdirən ziyalı, oftalmologiya elminə əvəzolunmaz töhfələr vermiş böyük alim Zərifə xanım Əliyevanın həyatı, elmi və yaradıcılıq fəaliyyəti, Azərbaycan qadınlıq tarixində tutduğu müstəsna yer barədə xanım yazarın dedikləri tələbələr tərəfindən diqqətlə dinlənilib.
Hörmətli qonaq, Azərbaycan Beynəlxalq Radiosunun şöbə müdiri Natəvan Dəmirçioğlu özünün dediyi kimi, Zərifə xanımın xatirəsinin işığında bir sıra digər məsələlər barədə də tələbələrlə fikir bölüşüb. Onları Azərbaycanın dövlət maraqları, xalqımızın mənafei, milli-mənəvi dəyərlər sistemimizin qorunması və mühafizə edilməsi naminə fəal, savadlı və aydın ictimai mövqeyi olan vətandaş görməık istədiyini səsləndirib.
Bakı Slavyan Universitetində İbtidai təhsil kafedrasının dosenti Şükufə Ağakişiyevanın təşkilatçılığı ilə hazırlanan tədbirin davamında Məktəbəqədər təlim-tərbiyə və ibtidai təhsil fakültəsinin tələbələri ana haqqında şeirlər səsləndiriblər. Sonda çıxış edən Məktəbəqədər təlim-tərbiyə və ibtidai təhsil fakültəsinin dekanı, professor Flora Naciyeva kafedra tərəfindən akademik Zərifə Əliyevaya həsr olunmuş anım tədbirlərinin hər il ənənəvi olaraq keçirilməsini yüksək qiymətləndirib, qonağa və çıxış edən tələblərə minnətdarlığını bildirib.
