Ermənistan prezidenti Serj Sarkisyan 2009-cu ildə Türkiyə ilə münasibətlərin normallaşması üçün imzaladığı protokolu ləğv edib. Sarkisyan qərarını Ermənistan Milli Təhülkəsizlik Şurasının toplantısında açıqlayıb. Xatırladaq ki, iki ölkə arasındakı protokol 10 oktyabr 2009-cu ildə İsveçrənin Sürix şəhərində imzalanmışdı.
Ermənistan tərəfindən XİN rəhbəri Eduard Nalbandyan, Türkiyə tərəfindən isə ovaxtkı xarici işlər naziri Əhməd Davudoğlu protokola qol çəkmişdi. Ancaq ötən müddət ərzində tərəflərin heç biri protokolu parlamentdə ratifikasiya etməyib. Çünki Türkiyə tərəfi düşmən ölkə qarşısında işğal edilmiş Azərbaycan torpaqlarının geri qaytarılması şərtini qoyub.
Sarkisyanın qərarı ilə bağlı "Şərq”ə danışan politoloq Natiq Miri deyib ki, Ermənistan rəhbərinin açıqlamasında əsas məqsəd protokolu yenidən gündəmə gətirməkdir. Ekspertin sözlərinə görə, Sarkisyanın pafoslu açıqlamasına rəğmən, Ermənistanın Türkiyəyə böyük ehtiyacı var:
"Düşmən ölkənin gələcək perspektivi mütləq mənada Türkiyə ilə əlaqələrin bərpa olunmasından asılıdır. Əks təqdirdə Ermənistanın Qərbə çıxışı tamamilə bağlı olacaq. Qərb qapısının bağlanması işğalçı ölkənin inkişafının üstündən xətt çəkəcək. Əslində protokolun ləğvi ilə bağlı açıqlama verən Sarkisyan dünyanın diqqətini bu məsələyə yönəltmək istəyir.
Ancaq nəzərə almaq lazımdır ki, bu protokolun imzalanmasına rəğmən Türkiyə ilə Ermənistan sərhədlərinin bağlanması və diplomatik əlaqələrin kəsilməsi konkret səbəbə bağlıdır. Bu səbəb Azərbaycan torpaqlarının işğal olunmasıdır. İşğal faktı aradan qaldırılmadığı təqdirdə nəticə olduğu kimi qalacaq. 2009-cu ildə imzalanmış bu protokolla bağlı Obamanın ABŞ-a rəhbərlik etdiyi dövrdə dövlət katibi H.Klinton hərəkətə keçmişdi. Xanım Klinton tərəflərə təzyiqlər etməyə çalışaraq prosesin irəliləməsinə çalışmışdı. Ancaq bu baş tutmadı. Çünki qardaş Türkiyə heç vaxt Azərbaycanı gözardı etməz.
Düşmən ölkə isə çalışır ki, Qərb dövlətləri Türkiyəyə təzyiq göstərsinlər. Sarkisyan hələ də anlamır ki, sərhədlərin açılması Türkiyədən yox, birbaşa düşmən ölkənin özündən asılıdır”.
İsmayıl
