"Azərbaycan yazarlarının Güney Azərbaycanda fəaliyyət göstərən yazarların taleyi ilə maraqlanması yaxşı təşəbbüsdür”.
Bunu Sherg.az-a bir qrup Azərbaycan yazarının İranda yaşayan və həbs edilən azərbaycanlı yazarların azadlığa buraxılması haqqında İran prezidentinə məktubla müraciətinə münasibət bildirərkən millət vəkili Fazil Mustafa deyib. O bildirib ki, burada söhbət yalnız milli təəssübkeşlikdən getmir:
"Yazarlar ilk növbədə humanizm və insanlıq prinsipi ilə çıxış edərək bu problemi gündəmə gətiriblər. Normal yanaşıram. Müraciətin təsirinin olub-olmamasından asılı olmadan bu, bir kollektiv çalışmadır. Hesab edirəm ki, bunu Azərbaycan cəmiyyətində insanlara məsələnin mahiyyəti üzrə çatdırmaq lazımdır. İranda yaşayan soydaşlarımızın vəziyyətinin necə olmasını doğru anlatmaq gərəkir. Onların da azadlığa çıxması, sıxıntılardan qurtulması üçün şimaldan qardaş köməyi göstərilməsinə borc kimi baxılmalıdır. Ümid edirəm ki, tək yazarlar deyil, başqa peşə sahibləri də bununla bağlı müəyyən işlər görə bilər”.
Deputat əlavə edib ki, İranın aidiyyatı strukturları tərəfindən məktuba reaksiya verilə bilər:
"Mən ümid etmək istəyirəm ki, İran tərəfi buna uyğun addım atacaq. Düzdür, şərtlərdə inandırıcı görünmür, amma İranda da səlis, normal düşünən insanlar var. Onlar da anlayırlar ki, insan haqlarına qarşı hər hansı davranışın nəticələri müsbət olmayacaq. Ona görə, hesab edirəm ki, İran tərəfi də müəyyən müsbət addımlar atmağa səy göstərəcək”.
Müraciətin mətnini aşağıdakı linkdə oxuya bilərsiniz:
Aysel Aslan
