"Belə halların yığışdırılması üçün ali məktəblərə qəbul sistemində dəyişiklik edilməsi vacibdir".
Bunu Sherg.az-a bəzi məktəb direktorların şagirdlərin valideynlərindən "haqq" alıb, övladının dərsə gəlməməsi müqabilində ona qayıb, əvəzi iştirak edir yazdırması mələsindən danışarkən sabiq təhsil naziri Firuddin Cəlilov deyib.
O, bildirib ki, "Repetitor yanına gedirəm" deyib, məktəb fənlərini kənara qoymaq düzgün deyil:
"Uşaqlar bununla ancaq öz qrupundakı fənlərdən bilik əldə edir, yerdə qalanlardan xəbəri olmur. Məktəb isə şagirdi hərtərəfli hazırlayır. Yəni şagird məktəbdə vətəndaş kimi yetişməlidir. Məktəb proqramından xəbəri olmalıdır ki, hər sahədə biliyi olsun. Uşağı ayırıb, ancaq lazım olan fənlərdən hazırlaşdırmaq onu korlayır. Abituriyent hazırlaşdığı fənlərdən yaxşı oxusa ali məktəbə daxil olacaq, lakin orada yaxşı oxuya bilməyəcək. Çünki onun ümumtəhsil bazası yoxdur. Bu məsələnin axsayan tərəfləri olduğuna görə sistem dəyişməlidir. Test imtahanlarını elə etmək lazımdır ki, 4-5 fənni deyil, başqa fənləri də əhatə etsin. Bununla valideynlər maraqlı olsun ki, uşağını məktəbdən ayırmasın”.
Direktorların rüşvətə yol verməsinin qarşısını inzibati yolla almağın mümkün olmadığını deyən F. Cəlilov əlavə edib ki, bu hadisələri yalnız sistemi dəyişməklə,öz içərisindən tənzimləmək olar".
Qeyd edək ki, son zamanlar bəzi məktəb direktorları şagirdlərin valideynlərindən rüşvət alıb, onun övladının dərslərdə iştirak etməməsinə göz yumması halı çoxalıb. Hətta direktor həmin rüşvət müqabilində şagirdə iştirak edir yazdırmaqla yanaşı, ona əla qiymətlər yazır.
Ayyət Əhməd
