"Hər bir xəstə Azərbaycan vətəndaşdır. Xəstələrin psixi durumundan asılı olmayaraq onun şəxsiyyətinə, sağlamlığına ziyan vuracaq əməllər yolverilməzdir”.
Bunu Sherg.az-a Maştağa qəsəbəsində yerləşən 1 saylı Ruhi Əsəb Dispanserində müalicə alan xəstələrdən birinin gözünün çıxarılmasına münasibət bildirərkən tibb elmləri doktoru, professor Adil Qeybulla deyib.
O bildirib ki, ruhi dispanserdə həmin xəstələrin təhlükəsizliyi təmin olunmalıdır:
"Ruhi, əsəb xəstəlikləri olan xəstələrdə qarabasmalar, ətraf aləmin düzgün qavranılmamağı kimi hallar baş verir. Bu tip xəstələr dispanserə daxil olduqda əsəb diaqnozuna uyğun onlarla davranılmalıdır. Xəstələrin yerləşdirilmə yeri fərqli otaqlar olur. Xəstələr bəzən insident şokuna salınır və digər müalicə üsulları tətbiq edilir ki, onlar vaxtında ayılsınlar və özlərini adekvat aparsınlar. Ümumiyyətlə, 1 saylı Ruhi Əsəb dispanserində təhlükəsizlik qaydalarına ciddi şəkildə riayət olunur. Bir xəstəyə xəsarət yetirilməsi, onun sağlamlığına ziyan vurulması halları baş verərsə, bu ciddi araşdırılır. Çünki bu artıq cinayət əməli hesab olunur. Nəzərə alsaq ki, bu cür xəstələrin davranışları adekvat deyil və onlar özlərinə də xəsarət yetirə bilərlər. Onların olduqları yerlərdə əl altında müxtəlif soyuq silahların iti, kəsici alətlərin saxlanmasına yol verilmir. Çarpayıların və digər əşyaların təhlükəsizlik qaydalarına cavab verməsi mühüm şərtdir. Həmin əşyalardan və ya hissələrindən xəsarət yetirmək məqsədilə istifadə edilə bilər. İstənilən halda bu hadisə kriminal olay kimi dəyərləndirilir və araşdırılma aparılmalıdır”.
Qeyd edək ki, Maştağa qəsəbəsində yerləşən 1 saylı Ruhi Əsəb Dispanserində müalicə alan xəstələrdən birinin gözü çıxarılıb. Bu haqda xəsarət almış xəstə 51 yaşlı Mürvət Səfərovun qardaşı Allahverdi Səfərov şikayət edib.
Ayyət Əhməd
