“Yeganə yolumuz beynəlxalq qurumların ədalətsizliyini hər fürsətdə gündəmə gətirmək, onları girovlarımızla bağlı addım atmağa məcbur etməkdir”
"Ermənilər tərəfindən girov götürülən Dilqəm Əsgərov və Şahbaz Quliyevin azad olunması üçün beynəlxalq təşkilatlara müraciət olunub, iş davam edir”. Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndəsi Eldar Səmədov bildirib. Lakin Komissiya rəsmisi təəssüflə vurğulayıb ki, Ermənistanın tutduğu qeyri-konstruktiv və qeyri-humanist mövqe nəticəsində girovların bu günə kimi azad olunmasına nail ola bilməmişik:
"İnanıram ki, ölkə rəhbərliyinin başçılığı ilə bu məsələnin öhdəsindən gələcəyik”. Bütün cəhdlərə baxmayaraq, girovların azad edilməsinin yubanması ilə bağlı "Şərq”ə fikirlərini bölüşən Bütöv Azərbaycan Xalq Cəbhəsi Partiyasının sədr müavini Niyaməddin Orduxanlı deyib ki, əslində kəlbəcərli soydaşlarımız Dilqəm Əsgərov və Şahbaz Quliyevin nümunəsində beynəlxalq təşkilatların nə qədər əhəmiyyətsiz olduğunun əyani şahidi oluruq. Partiya funksionerinin sözlərinə görə, beynəlxalq təşkilatlar bütün günü verdikləri bəyanatlarda, çıxışlarda özlərini insan hüquqlarının "müdafiəçisi” kimi təqdim edirlər:
"Amma 3 ilə yaxındır ki, hər iki soydaşımız girovluqda saxlanılır. Onların ailələrinə yazdıqları məktublardan açıq şəkildə görmək olur ki, hər ikisi ağır şəraitdə, işgəncəyə məruz qalırlar. Lakin bu günə kimi dünyanın ən aparıcı beynəlxalq qurumları məsələyə toxunmayıblar. Sanki Dilqəm Əsgərovu və Şahbaz Quliyevi görmürlər. Yaxud da özlərini görməməzliyə vururlar. Ancaq Azərbaycan əsgərinin öz sərhədini qoruması üçün müharibə şəraitində apardığı adi təlimi dərhal gündəmə gətirirlər, müharibənin yolverilməz olduğunu deyirlər. Azərbaycan tərəfinə təzyiq edirlər ki, sərhəd boyu yerləşdirdiyimiz snayperləri geri çəkək. Yəni snayperlərimizi görürlər, ancaq haqlı çağırışımıza səs vermirlər. Təsəvvür edin, bu gün bunun əksi baş versəydi, Azərbaycan Ermənistanın 2 mülki vətəndaşını girov saxlasaydı, bütün dünya üzərimizə "yürümüşdü”. Bu fakt bir daha onu göstərir ki, bu qurumların Azərbaycana ikili yanaşması var”.
Politoloq bildirib ki, yeganə yolumuz bu qurumların ədalətsizliyini hər fürsətdə gündəmə gətirmək, onları girovlarımızla bağlı addım atmağa məcbur etməkdir:
"Daim bu məsələni diqqətdə saxlamalıyıq. Bütün beynəlxalq tədbirlərdə problemin həlli üçün Ermənistana təzyiq edilməsini tələb etməliyik. Yəqin ki, günün birində insafa gəlib Ermənistana çağırışlar edəcəklər”.
İsmayıl
