O dərhal diaspora işi ilə bağlı bütün fəaliyyətlərdən kənarlaşdırılmalıdır
Rusiyada fəaliyyət göstərən Azərbaycan Milli Mədəni Muxtariyyətinin Moskva regional bölməsinin sədri Ağadadaş Kərimovun öz qızını erməni biznesmenə ərə verməsi sosial şəbəkələrin gündəmini zəbt edib. Məsələni gündəmə gətirənlər diaspora rəhbərinin ermənilərlə sıx əlaqədə olmasını, hətta daha irəli gedərək qohumluq yaratmasını kəskin tənqid ediblər.
Kərimovun qızının erməni oğlanla ailə həyatı qurması Moskvada yaşayan azərbaycanlılar arasında da birmənalı qarşılanmayıb. Soydaşlarımız diaspora rəhbərinin qeyd-şərtsiz sədrlikdən getməsini tələb ediblər. Bir qrup insan isə Azərbaycan Diasporla İş üzrə Dövlət Komitəsinə müraciət edəcəklərini bildiriblər. Real TV-yə danışan Ağadadaş Kərimov isə qızını erməniyə ərə verməsini normal hal adlandırıb. Hətta həyat yoldaşının da erməni olduğunu vurğulayıb: "Qızımın erməni oğlanla ailə həyatı qurmağı doğrudur. Bunu bütün dost-tanışlar bilirlər. Bu, normal hadisədir. Həyat yoldaşım da milliyətcə ermənidir”.
Məsələni aydınlaşdırmaq üçün Diasporla İş üzrə Dövlət Komitəsi ilə əlaqə yaratdıq. Komitənin mətbuat xidmətinin rəhbəri Esmira Xəlilova "Şərq”ə açıqlamasında dedi ki, qeyd olunan məsələnin Diasporla İş üzrə Dövlət Komitəsinə heç bir aidiyyəti yoxdur:
"Amma Dövlət Komitəsi belə halları nəzərə alaraq, dünyanın müxtəlif ölkələrində yaşayan soydaşlarımızı Azərbaycan dövlətinin, dövlətçiliyinin maraqlarını qorumağa və Vətənin təəssübünü çəkməyə çağırır”.
Günlərdir müzakirə olunan məsələ ilə bağlı fikirlərini "Şərq”ə bölüşən AĞ Partiya başqanı Tural Abbaslı deyib ki, biz xalq olaraq ermənilərə irqlərinə görə deyil, xəyanətkarlıqlarına, zülmlərinə və törətdikləri cinayətlərə görə nifrət edirik. Bu kontekstdən yanaşdıqda təbii ki, erməni ilə qurulan ailələrə birmənalı baxmaq mümkün deyil:
"Ermənilərin tarix boyu bizə qarşı həyata keçirdikləri cinayətləri, işğalları unutmaq olmaz. Biz unutduqca, onlar bu cinayətləri bir daha təkrarlayacaqlar. Nəzərə alsaq ki, ermənilər bu gün belə ərazilərimizi işğalda saxlayır, yüzlərlə vətəndaşlarımızın əsirlikdəki taleləri naməlumdur, o zaman belə bir qohumluq qətiyyən anlaşılan və qəbuledilən deyil. Erməni ilə evliliyi eşidəndə ilk ağlıma gələn odur ki, bu "ailə”nin üzvləri 26 fevralda Xocalıda baş verən soyqırıma necə reaksiya verəcək, Qarabağın işğalı barədə nə deyəcək, 1918-ci il mart qırğınlarına münasibətləri necə olacaq? Göründüyü kimi, bu cür evliliyin mənəvi əsasları yoxdur.
Erməni ilə evlənmək üçün millətini, tarixini və keçmişini unutmalısan. Beləsinə azərbaycanlı demək doğru deyil. Xüsusən, diaspora işi ilə məşğul olan birinin övladının bu hərəkəti atasının diaspora işində nə qədər "uğurlu” olduğunun bariz göstəricisidir”.
T.Abbaslının fikrincə, həmin şəxs dərhal diaspora işi ilə bağlı bütün fəaliyyətlərdən kənarlaşdırılmalıdır. Milli və dövlət maraqlarımızı özündə ehtiva edən heç bir işə yaxın buraxılmamalıdır:
"Diasporalarla İş üzrə komitənin yeni rəhbərliyi belə nöqsanları tez bir zamanda aradan qaldırmalı və daha effektiv fəaliyyət planı üzərində işləməlidirlər”.
İsmayıl
