"Rusiya-İran və ya Rusiya-Türkiyə münasibətləri dostluq müstəvisinə daşınacaqsa, burada ən yaxşı körpü Azərbaycandır”
"Azərbaycan və İran arasında iqtisadi, siyasi və digər sahələrdə əməkdaşlıqlar inkişaf etdirilir”.
Bu sözləri "Sherg.az”a Qarabağ Azadlıq Təşkilatının (QAT) sədri Akif Nağı deyib.
O xatırladıb ki, bir neçə gün əvvəl Ərdəbil şəhərində Böyük Qarabağ konfransı keçirilib:
"Həmin konfransda Türkiyə və İran nümayəndələri də iştirak edirdi. Ərdəbilin dini rəhbəri ilə geniş söhbətlər apardıq, münasibətlərin daha da genişlənməsində arzularımızı ifadə etdik. Qarşılıqlı əməkdaşlığın yüksəldilməsi həm Azərbaycanın, həm də İranın mövqeyinə uyğundur.
Mart ayının sonunda ölkəmizdə İran tərəfindən təsis edilmiş müəssisənin açılışı nəzərdə tutulur. Həmçinin Azərbaycanla birlikdə müştərək müəssisələrin tikintisi nəzərdə tutulur. Ən müxtəlif sahələrdə - kənd təsərrüfatı, əczaçılıq, sənaye və yüngül sənaye və s. istiqamətlərdə cənub qonşumuzla münasibətlər qurulub. Birgə layihələrin bundan sonra da davam etdirilməsi nəzərdə tutulur.
Mətbuatda İran və Ermənistan arasında yaxşı münasibətlərin olduğu, "İranın Ermənistana nəfəslik verdiyi” yazılır. Amma bu iki dövlətin elə də ciddi əlaqələri yoxdur. İran Ermənistanla münasibətlərdə maraqlı deyil.
Ermənistan adlı "meydança” Rusiya tərəfindən yaradılıb. Bu xalqdan Türkiyə və İrana qarşı düşmənçilik məqsədilə həmişə istifadə edilib. Rusiya-İran və ya Rusiya-Türkiyə münasibətləri dostluq müstəvisinə daşınacaqsa, burada ən yaxşı körpü Azərbaycandır”.
Qeyd edək ki, martın sonunda İran prezidenti Həsən Ruhaninin Azərbaycana səfəri gözlənilir. Məlumata görə, gələn həftə Bakıya İran hökumətindən nümayəndə heyəti gələcək və bu səfər zaman İran prezidentin səfərinin proqramı müzakirə olunacaq.
Aysel Aslan
