"Ermənilərin siyasətində yenilik yoxdur”
Bunu Sherg.az-a Ermənistanın Azərbaycan tərəfinin monitorinqdə olan ATƏT-in missiyasını guya təmas xəttinə çıxarmadığı haqqında həqiqəti əks etdirməyən informasiya yerləşdirməsini şərh edərkən millət vəkili Asim Mollazadə deyib.
Deputat bildirib ki, yalnız beynəlxalq təşkilatlara qarşı deyil, onların hər addımı elə yalan-böhtan üzərində qurulub:
"ATƏT-in Minsk qrupunun cəbhə xəttindəki monitorinqləri ilə bağlı ermənilərin təxribat xarakterli yalan məlumatlar yaymasında yenilik yoxdur. Onlar beynəlxalq ictimaiyyəti aldatmaq istəyirlər. Məqsədlərini həyata keçirmək üçün beynəlxalq təşkilatlara yalan məlumatlar, bəyanatlar verirlər. Hər bir hiyləyə əl atırlar ki, öz cinayətlərini ört-basdır etsinlər”.
Qeyd edək ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, martın 1-də Ağdam rayonunun Çəmənli kəndi istiqamətində yerləşən Azərbaycan və Ermənistan qoşunlarının qarşıdurma xəttində keçirilən monitorinqin insidentsiz başa çatması beynəlxalq missiya tərəfindən təsdiqini tapıb. Ermənistan tərəfi də monitorinqin müəyyən edilmiş qrafikə uyğun keçirilməsi və atəşkəs rejiminin pozulmaması barədə xəbər yaysa da, Azərbaycan tərəfinin guya ATƏT-in missiyasını təmas xəttinə çıxarmadığını bildirib.
