"Bu məsələnin qabardılmasının özünəməxsus önəmi və siyasi əhəmiyyəti var. Bu, təkcə təhlükəsizlik mənası daşımır. Hərbi amil hər zaman bir dövlətin siyasi, iqtisadi imkanlarını və mövqelərini gücləndirir”.
Bu barədə "Şərq”ə Milli Məclisin Təhlükəsizlik və müdafiə komitəsinin üzvü, millət vəkili Zahid Oruc Azərbaycan Prezidenti İlham Əliyevin ordumuzun hərbi gücünün artırılmalı olduğu haqda fikirlərini şərh edərkən deyib. Parlament üzvünün sözlərinə görə, xarici dairələr, ayrı-ayrı beynəlxalq qüvvələr, o cümlədən dövlətlər güclü ölkə ilə daha yaxşı əlaqələr qururlar. İnvestisiyalarına hər hansı bir risk hiss etmirlər: "Hazırda Ukraynaya investisiya qoymaq nə qədər perspektivli olar? Bu mənada ölkə başçısı bütün regional və beynəlxalq proseslərin konfedensial tərəflərini kifayət qədər yaxşı bilir. İ.Əliyev Azərbaycanın zəif olacağı təqdirdə, bizi hansı təhlükələrin gözləyə biləcəyini nəzərə alaraq bu cür bəyanatlar verir. Təbii ki, bu mesajın başqa bir hədəfi də var. Heç şübhəsiz ki, bu, Ermənistan dövlətidir. Ölkəmiz bu dövr ərzində təcavüzə məruz qalmasına baxmayaraq, bir çoxlarının düşüncələrində dövlət kimi məhv olmadı. Əksinə, dövlətimiz öz imkanlarını səfərbər edərək toparlana bildi. Ayağa qalxdı.
Məsələnin başqa bir tərəfi ondan ibarətdir ki, Azərbaycan təkcə hərbi amillə məhdudlaşmır: "İqtisadi resurslar da müharibə üçün önəm daşıyır. İnsani resurslar, informativ və diplomatik imkanlar da vahid tələbə tabe edilir. Düşünürəm ki, Azərbaycanın son günlər hərbi resurslarının yenidən qurulması, silahlı qüvvələrinin təzədən formalaşması və daha da üst səviyyəyə gətirilməsi üçün çox böyük miqyasda işlər görülür. Bu, əsgərin, zabitin mənəvi-psixoloji şəraiti və başqa komponentlərlə əlaqəlidir. Bütövlükdə bütün məsələlər Azərbaycanın ümumi gücünə təsir edir”.
Ayyət Əhməd
