İranda "İslam inqilabı”nın 38-ci ildönümü ölkə miqyasında təntənəli şəkildə qeyd olunub. Mərasimlərə qatılan milyonlarla iranlı Amerika rəsmilərinin İrana qarşı mövqe sərgiləməsinə sərt etiraz ediblər.
Küçələrə axışan əhali ABŞ, İsrail və İngiltərə əleyhinə şüarlar səsləndirib, Trampın fotolarını ayaqlar altına atıblar. Tehrandakı mərasimdə çıxış edən Prezident Həsən Ruhani də ABŞ rəhbəri Donald Trampı tənqid edib. Ruhani ABŞ-da və digər ölkələrdə "xam adamların” iqtidara gəldiyini söyləyib. Prezident bəyan edib ki, hər kəs İran xalqına hörmətlə yanaşmalıdır. İranın bölgədə və dünyada gərginlik tərəfdarı olmadığını vurğulayan Ruhani ölkəsinə göz dikənlərin qarşısında dik duracaqlarını deyib: "Xalqımızın təhdidlərə qarşı cavabı çox sərt olacaq. Dövlətimizi və silahlı qüvvələrimizi təhdid edənlər İran xalqının həmrəylik içində olduğunu və düşmənlərə qarşı sona qədər mübarizə aparacaqlarını bilməlidirlər”.
Xatırladaq ki, İranda 1979-cu ildə ayətullah Xomeyni rəhbərliyində çevriliş edilərək Məhəmməd Rza Pəhləvi idarəçiliyinə son verilib. Qurulan rejim isə İran İslam Respublikası adlandırılıb.
İsmayıl
