"Əvvəllər Bakı şəhərində 50 min manatdan aşağı birotaqlı mənzil tapmaq mümkün deyildisə, hazırda 30-35 min manata ev almaq mümkündür”. Bunu Əmlak Ekspert Mərkəzinin direktoru Ramin Osmanlı deyib.
Mənzil bazarındakı mövcud durumu dəyərləndirən ekspert vurğulayıb ki, ilin əvvəlində mənzillərin qiymətində artım müşahidə olunsa da, proses tədricən ucuzlaşma ilə əvəz olunur: "Nisbi qiymət azalmaları var. Bütövlükdə 2014-cü ilin sonunda qeydə alınmış rəqəmlərlə indiki qiymətlər arasında təxminən 30-35 faizdən çox fərq var. Ölkənin mövcud iqtisadi vəziyyəti mənzil bazarında da özünü göstərir”.
Mənzillərin ucuzlaşması iddiası ilə bağlı "Şərq”ə açıqlama verən iqtisadçı-ekspert Rəşad Əliyev deyib ki, son 10 il ərzində təklif bazarında böyük həcmdə dəyişiklik müşahidə edilir. Ekspert vurğulayıb ki, axır zamanlar satıcılara şəhər ətrafında tikilən mənzillər daha çox təklif olunur:
"Halbuki əvvəlki dövrlərdə şəhərdən kənarda yeni tikililərə çox az rast gəlinirdi. Ancaq sonradan mərkəzdən uzaq yerlərdə mənzillər çoxaldı. Məsələn, Xırdalanda xeyli sayda yaşayış binası tikildi, 7-8 il bundan qabaq orada vəziyyət tamam başqa cür idi. Onu da deyim ki, tikilən binaların yerləşdiyi ərazilər arasında bu cür bölgü aparılır: - Mərkəzdə, mərkəzə yaxın yerlərdə və mərkəzdən uzaqda tikilən mənzillər.
Hazırda ucuz mənzillərin meydana çıxmasının əsas səbəbi şəhər ətrafında çoxsaylı mənzillərin tikilib müştərilərə təklif edilməsidir. Bu proses təklif bazarına müsbət təsir göstərir. O ki, qaldı qiymət tendensiyasına, ucuz mənzillərin qiymətlərində manat ifadəsində elə də əhəmiyyətli ucuzlaşma baş verməyib. Söhbət ümumi məbləğin cüzi azalmasından gedir”.
İsmayıl
