"Əli Kərimli ölkədə mövcud olan dialoq və əməkdaşlıq mühitinin daha da dərinləşməsindən ciddi narahatlıq keçirir”. Bunu "Sherg.az”a açıqlamasında millət vəkili, siyasi elmlər doktoru Hikmət Babaoğlu deyib.
Deputat bildirib ki, AXCP sədri Azərbaycan cəmiyyətində ziddiyyətlərin və qütbləşmənin olmasını arzu edən bir şəxsdir. Çünki o, bütün siyasi fəaliyyətini və siyasi məqsədini cəmiyyətdəki qarşıdurmalar üzərindən qurmağa çalışır:
"Bu isə Azərbaycan xalqının milli və dövlət maraqları ilə ziddiyyət təşkil edir. Hazırda biz mürəkkəb tarixi mərhələdə və beynəlxalq münasibətlər sistemində yaşayırıq. Ona görə də milli maraqlarımızı təmin etmək üçün Azərbaycan cəmiyyətinin hər bir üzvünün fəaliyyəti məhz milli maraqlara yönəldilməlidir. Milli maraqlara istiqamətləndirilməlidir. Vaxtilə bir qrup insan Azərbaycandan köçərək müxtəlif ölkələrdə məskunlaşıblar. Digər tərəfdən, onların fəaliyyəti müxtəlif istiqamətlərdə olub. Hazırda isə insanlar nəyin nə üçün baş verdiyini çox yaxşı dərk edirlər. Biz qlobal informasiya məkanında yaşayırıq. Bütün informasiyalar hər bir fərd üçün əlçatandır. Qərəzi olmayan, savadlı, ağıllı, vətənsevər insanlar dərk edirlər ki, fəaliyyətləri ilə milli maraqlar ətrafında birləşməlidirlər”.
Parlament üzvü bildirib ki, Vətənimiz və dövlətimiz üçün yaxşı olan amillər övladlarımızın gələcəyinin təmin olunmasıdır. Onların firəvan, inkişaf edən, demokratik ölkədə yaşaması deməkdir:
"Bu həqiqəti dərk edən insanların sayı hər gün daha da çox artır. Vaxtilə əks mövqedən çıxış edən insanlar daha rasional düşünməyə başlayırlar. Əslində bu çox yaxşı bir tendensiyanın başlanğıcıdır. Ancaq Əli Kərimlinin fəaliyyəti bu məqsədlərə hesablanmayıb. Elə ona görə də onun fəaliyyəti Azərbaycanda qarşıdurma yaratamaq istəyən anti-Azərbaycançı qüvvələrlə üst-üstə düşür. Yaxud koordinasiyalı olduğuna görə o, bundan ciddi narahatlıq keçirir. Əlbəttə, kimin nədən narahatlıq keçirməsinə baxmayaraq, Azərbaycanın bütün intellektual, ictimai fəal fərdləri, ölkəmizi düşünən hər bir azərbaycanlı mütləq şəkildə Azərbaycanın mənafelərini müdafiə etməlidir. Dövlətimizin inkişafı üçün əlindən gələni etməyə çalışmalıdır”.
İsmayıl
