"Azərbaycan digər dövlətlərlə genişmiqyaslı iqtisadi əməkdaşlıqda hər zaman maraqlıdır”.
Bunu "Sherg.az”a Azərbaycan Prezidenti İlham Əliyevin Rusiya səfəri və onun nəticələri haqqında danışarkən millət vəkili Asim Mollazadə söyləyib.
O diqqətə çatdırıb ki, səfər nəticəsində Azərbaycan və Rusiya arasında iqtisadi münasibətləri şaxələndirən sənəd imzalanıb:
"Azərbaycan və Rusiya enerji, nəqliyyat, ticarət kimi sahələrdə əməkdaşlığın genişləndirilməsi istiqamətində müəyyən razılığa gəliblər. Ümidvarıq ki, sözügedən sənəddə göstərilən müddəalar həyata keçiriləcək. Bu, şimal qonşumuzla iqtisadi və digər sahələrdə qarşılıqlı münasibətlərin möhkəmləndirilməsi üçün əhəmiyyətlidir”.A.Mollazadə onu da bildirib ki, səfər çərçivəsində Azərbaycan və Rusiya arasında Ermənistan-Azərbaycan Dağlıq Qarabağ münaqişəsinin tənzimlənməsi məsələsi də müzakirə edilib:
"Rusiyanın bu münaqişənin həlli üçün dəstəyini əsirgəməyəcəyi qeyd olunub. Məlumdur ki, Ermənistan müstəqil ölkə deyil. Kremlin bu dövlətə böyük təsir imkanları var. Ona görə, Rusiyanın beynəlxalq hüquq normaları çərçivəsində münaqişənin həlli üçün Azərbaycana dəstək verməsi mümkündür. Sözügedən məsələ ətrafında danışıqlar aparılır”.
Azərbaycan və Rusiya arasında humanitar sahədə əməkdaşlığa da toxunan deputat ölkələr arasında təhsil, mədəniyyət və s. hissələrdə əməkdaşlığı yüksək qiymətləndirir:
"Ümidvaram ki, ölkə başçısının Rusiya səfərindən sonra bu kimi məsələlərdə də əməkdaşlıq özünü göstərəcək. Buna böyük ehtiyac var”.
Qeyd edək ki, ölkə başçısının Rusiyaya səfəri çərçivəsində Rusiya Federasiyası Hökuməti və Azərbaycan Respublikası Hökuməti arasında 2024-cü ilə qədər əməkdaşlıq Proqramı imzalanıb. Sözügedən sənəddə ölkələr arasında iqtisadi, humanitar, enerji və s. sahələrdə əməkdaşlıq nəzərdə tutulur.
Aysel Aslan
