Müdafiə Nazirliyi əsgər valideynlərinə müraciət edib. Nazirliyin saytında yer alan müraciətdə belə deyilir: "Hörmətli vətəndaşlar!
Hərbi qulluqçuların təhlükəsizliyi naminə telefon əlaqəsi və sosial şəbəkələrdən istifadə zamanı hərbi xidmət barədə müzakirələr aparmayın!
Hərbi hissə, onların yerləşmə yerləri, silah-sursatı, hərbi texnikası haqqında və hərbi qulluqçulara dair fotoşəkilləri paylaşmayın!”.
Nazirliyin müraciətini şərh edən ehtiyatda olan polkovnik Üzeyir Cəfərov isə hesab edir ki, artıq Müdafiə Nazirliyi bu cür xəbərdarlıqları yekunlaşdırıb, icraata keçməlidir: "Hərbiçilərin təhlükəsizliyi naminə onlar haqqında məlumatların, görüntülərin yayılmasına dair tövsiyələr və xəbərdarlıqlar çox olub. Ancaq çox təəssüflər olsun ki, bəzi valideynlər, dost-tanışlar və xüsusən də media nümayəndələri nazirliyin bəyanatlarına məhəl qoymadan özlərini kifayət qədər sərbəst aparırlar. Hərbi texnikanın, hərbi hissənin yanında çəkilən şəkilləri sosial şəbəkələrdə paylaşmaq, mətbuata ötürmək olmaz. Bəzi dostlarımız hörmətli generallarımızla çəkdirdikləri fotoları paylaşıb, altında da yazırlar ki, filan saylı hərbi birləşmənin komandiri filankəsov filankəs. Halbuki rütbəli şəxslərin vəzifəsini göstərmək olmaz. Əgər təqdimata ehtiyac varsa, o zaman zabit kimi təqdim etmək olar. Bizim insanlar isə bunların heç birinə məhəl qoymur. İyulun 1-dən həqiqi hərbi xidmətə çağırış başlayıb. Həqiqi hərbi xidmət üçün çağırış vərəqəsi alan şəxslər sosial şəbəkələrdə bu cür paylaşımlar etməklə öz sevinclərini yaxınları ilə bölüşürlər.
Yaxud da qohumu və ya qonşusu, dostu-qardaşı əsgər gedən insanlar açıq şəkildə əsgər gedən uşağın şəklini paylaşıb, xidmət edəcəyi hərbi hissənin və qoşun növünün adını yazırlar. Hərbi hissələrin nömrələrinin sosial şəbəkələrdə paylaşılması düşmənə əlavə məlumat verir. Əziz vətəndaşlar, başa düşün ki, ən xırda ehtiyatsızlıq minlərlə şəxsi heyətin həyatını təhlükə altına salmaq deməkdir. Biz bunun ciddiliyinin fərqinə varmalı və narahat olmalıyıq. Müharibə şəraitində olan bir ölkənin vətəndaşları ordusunun təhlükəsizliyinə qarşı bu cür laqeyd münasibət göstərməməlidir”.
Şəymən
