"Ötən illərə nisbətən bu il qəbul imtahanları üçün müəyyən olunan keçid balları endirilib”.
Bunu Sherg.az-a bu il üçün ali məktəblərə I-IV ixtisas qrupları üzrə qəbul zamanı müəyyən olunan keçid ballarına münasibət bildirərkən təhsil eksperti, Azad Müəllimlər Birliyinin sədri Məlahət Mürşüdlü deyib.
O bildirib ki, açıqlanan keçid balları dəfələrlə aşağı rəqəmlərdir:
"Düşünürəm ki, bu il müəyyən olunan keçid ballarına görə, Azərbaycanda orta məktəbləri 2 və ya 3 qiymətləri ilə bitirən abituriyentlər də tələbə adını qazanacaq. Belə getsə, ölkəmizdə "ali təhsil" almayan qalmayacaq”.
Ümumi keçid ballarına uyğun fərqli ixtisasların ballarının azalıb, azalmayacağının hələlik məlum olmadığını söyləyən M.Mürşüdlü deyib ki, bu tendensiya abituriyentlərin topladığı ballardan asılı olaraq tənzimlənəcək:
"İmtahan zamanı müsabiqə nəticələrinə uyğun ixtisas balları dəyişə də bilər. Ola bilər ki, imtahan nəticələri yüksək və ya aşağı olsun. Bu zaman ümumi keçid balları da, ixtisasların müvafiq balları da ümumi nəticələrə uyğun tənzimlənəcək”.
Qeyd edək ki, I ixtisas qrupu üzrə müsabiqəyə ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 250-dən və hər bir imtahan fənni üzrə ayrılıqda topladığı nisbi balı 10-dan az olmayan), II ixtisas qrupunda ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 300-dən və hər bir imtahan fənni üzrə ayrılıqda topladığı nisbi balı 10-dan az olmayan), III ixtisas qrupunda ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 300-dən və hər bir imtahan fənni üzrə ayrılıqda topladığı nisbi balı 10-dan az olmayan), IV ixtisas qrupunda isə ümumi balı 250-dən, hər hansı bir imtahan fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 250-dən və hər bir imtahan fənni üzrə ayrılıqda topladığı nisbi balı 10-dan az olmayan) abituriyentlər buraxılırlar.
Aysel Aslan
