Ötən il ərzində ölkəmizdə 280 nəqliyyat vasitəsinin oğurlanması və qaçırılması barədə Baş Dövlət Yol Polisi İdarəsinə (BDYPİ) məlumat daxil olub. Oğurlanan nəqliyyat vasitələrindən isə 227-i tapılıb.
BDYPİ avtonəqliyyat vasitələrinin qeydiyyat hərəkətləri zamanı məlumat bazası ilə axtarışda olan 20 şəxs və 57 avtomobil saxlanılıb, habelə aqreqat nömrələrinin qeydiyyat sənədləri ilə uyğunsuzluq üzrə 1104 fakt və 94 saxta sənəd aşkar olunaraq materiallar araşdırılması üçün təhqiqat orqanlarına göndərilib.
"Digesta” hüquq firmasının direktoru, yol hərəkəti üzrə ekspert Ərşad Hüseynov Rusiya və Avropa ölkələri ilə müqayisədə Azərbaycanda avtomobil oğurluqlarının yox dərəcədə olduğunu söyləyib. Ekspert buna baxmayaraq ölkəmizdə vətəndaşların diqqətli olmasının, hüquq-mühafizə orqanlarının isə çevikliyinin vacib faktor olduğunu diqqətə çatdırıb:
"280 o qədər də böyük rəqəm deyil. Avtomobil kifayət qədər dinamik bir qurğudur. Ölkəmizdə mühafizə sistemi zəif və sökülməsi asanlıqda mümkün olan nəqliyyat vasitələri oğurlanır. 227 nəqliyyat vasitəsi tapılıbsa, yerdə qalan 53 fakt o deməkdir ki, böyük ehtimalla avtomobil talanıb. Paytaxtda avtomobil oğurlandıqdan sonra ona nə edəcəkləri sualı yaranır. Avtomobillər oğurlandıqdan sonra harasa aparılıb hissələr şəklində satılır. Bəzən insanlar hissələrin haradan olduğu haqqında maraqlanır və faktın üstü açılır. Vətəndaşların diqqətli olması çox önəmlidir. Oğurluq hallarında dərhal hüquq-mühafizə orqanlarına məlumat verilməlidir. Çünki Bakıdan qaçırılmış avtomobili 3-4 saatdan sonra Azərbaycanın ən ucqar yerinə aparmaq olar. Polisə tez xəbər vermək lazımdır ki, məsələnin üstünə ciddi izlərlə getsin. Polislər isə informasiyanın qəbulu və ötürülməsində çevik olmalı, növbətçi hissə gəlib dərhal informasiya yaymalı, hansı əlamətdə avtomobil oğurlandığı aşkar edilməlidir”.
Yeganə Bayramova
