"Biz həmişə xəstə, yaşlı məhbusların adının əfv siyahısına salınmasını istəyirik. Məhbuslar arasında eləsi var, ağır xəstəliyə tutulub, eləsi var, yaşı 70-dən yuxarıdır. Ömrünün çox hissəsi gedib artıq. Belə məhbusların azadlığa buraxılması əlbəttə, arzuolunandır”.
Bu fikirləri "Şərq”ə D.Əliyeva adına Qadın Hüquqlarını Müdafiə Cəmiyyətinin sədri, hüquq müdafiəçisi Novella Cəfəroğlu deyib.
N.Cəfəroğlu ömürlük məhbuslar, o cümlədən sabiq "OMON”çular arasında da yaşlı və xəstələrin olduğunu xatırladıb:
- Ömürlük məhbuslar arasında Hepatit, şəkərli diabet, epilepsiya, vərəm xəstələri olanlar var. Ömürlük məhbuslardan bəziləri cəzalarının böyük hissəsini artıq çəkib. Bəziləri 20 ildən artıqdır həbsxanadadır. Onların cəzalarının çəkilməmiş hissəsindən azad edilməsi, ya da şərti azadlığa buraxılması dövlətimizin humanizm prinsiplərinə sadiqliyinin bir daha təsdiqi olardı.
Qeyd edək ki, bu günlərdə Azərbaycan Prezidentinin təqdimatı ilə Cinayət Məcəlləsinin 76-cı maddəsinə (cəzadan şərti olaraq vaxtından əvvəl azad etmə) yeni 4-1 bəndinin əlavə edilməsi təklif olunur. Təklif qəbul edilərsə, ömürlük məhbusların azadlığa çıxmaq şansı yaranacaq.
Yeni bəndə görə ömürlük azadlıqdan məhrumetmə növündə cəza çəkən şəxsin bu məcəllənin 57.3-cü maddəsində nəzərdə tutulmuş qaydada cəzadan şərti olaraq vaxtından əvvəl azad edilməsi zamanı onun cəza çəkdiyi dövrün son beş ili ərzində cəzanın çəkilməsi qaydalarına əməl edilməsi halları nəzərə alınır. Bu isə "ömürlük”lərin azadlıqlarına qovuşması yolunda yaşıl işıq deməkdir.
N.Cəfəroğlu qeyd etdi ki, Prezidentin təklif etdiyi dəyişiklik çox mütərəqqidir:
- Son zamanlar Azərbaycan qanunvericiliyinin bütün sahələrdə daha çox mütərəqqiləşməsinin, humanizm prinsiplərinə daha çox istinad edilməsinin şahidi oluruq. Hüquqi sistemin humanistləşdirilməsi prosesi gedir. Bu, hüquq müdafiəçisi olaraq bizi çox sevindirir. Biz Prezidentin bu addımlarını dəstəkləyirik. Cinayət Məcəlləsinə təklif olunan dəyişiklik də əlbəttə ki, humanizm prinsiplərinin əsas götürülməsi baxımından çox mütərəqqi addımdır. İnanırıq ki, CM-yə dəyişikliklər qəbul olunarsa, bu, 20 ildən artıq həbs cəzası çəkən, həmçinin artıq yaşlanmış, xəstə məhbusları da əhatə edəcək.
Məlahət Rzayeva
