İşğal altındakı Dağlıq Qarabağ bölgəsində yerləşən separatçı rejim iki təxribatçı təklif irəli sürüb. Sərsəng su anbarının resuslarının Azərbaycan və "Dağlıq Qarabağ Respublikası” arasında bölüşdürülməsi, Azərbaycan tərəfinin Xankəndində yerləşmiş hava limanının təhlükəsizliyinə təminat verməsi və uçuşlara sərbəst şərait yaradılması bu təkliflər sırasındadır. Ekspertlərə görə, separatçıların gündəmə gətirdiyi məsələ dolayı yolla İrəvanın arzularıdır.
Düşmən tərəfin təxribatçı addımını "Şərq”ə dəyərləndirən "Atlas” Araşdırmalar Mərkəzinin eksperti Zeynal Əmralıyev deyib ki, qondarma qurumun bu təklifi öz ağaları ilə razılaşdırılıb. Yəni təklif bir növ İrəvandan gəlib.
Ekspertin sözlərinə görə, 20 ildən çoxdur torpaqlarımızı işğal altında saxlayan, ərazimizdə dəfələrlə soyqırımlar törədən, insanlarımızı hər cür terrora məruz qoyan düşmənin belə bir təkliflə çıxış etməsi ikiüzlülüyün parlaq nümunəsidir:
"Əslində, təklifin mahiyyəti bəllidir. Erməni tərəfi hər vəchlə Qarabağdakı separatçı rejimin danışıqlara tərəf kimi cəlb edilməsinə çalışır. Qondarma qurum bu cür təkliflərlə beynəlxalq ictimaiyyətin diqqətini özünə çəkməyə çalışır. Həm də terrorçu sifətini humanizmlə pərdələməyə cəhd göstərir. Şübhəsiz, bu təkliflərin heç biri Azərbaycan tərəfindən qəbul edilə bilməz. Əvvəla ona görə ki, ölkəmizin ərazi bütövlüyü prinsipinə ziddir. İşğal altında olan digər bölgələr kimi Sərsəng su anbarı da ölkəmizin ərazisinə daxildir. Beynəlxalq ictimaiyyət də bunu belə qəbul edir”.
Analitik diqqətə çatdırıb ki, erməni tərəfi uzun illər cəbhə xəttində yaşayan soydaşlarımıza qarşı süni maneələr yaradıb, sakinlərin istifadə etdiyi suyu yararsız vəziyyətə salıb, kənd təsərrüfatı ilə məşğul olan dinc əhalini atəşə tutub:
"Əkin sahələrinə bilərəkdən od vurulması bu vandallığın əlamətidir. Təkliflərlə çıxış etmək dünyanın gözünə kül üfürməkdən başqa bir şey deyil. Azərbaycan dövləti və xalqı üçün ərazi bütövlüyü prinsipi hər məsələdən öndə gəlir. Məsələ ondadır ki, təxribat xarakterli çıxışların və təkliflərin edilməsi münaqişənin sülh yolu ilə həllinə olan ümidləri yox edir. Ona görə də belə bəyanatların cavabını Xarici İşlər Nazirliyi deyil, birbaşa Müdafiə Nazirliyi verməlidir. Qondarma rejimin hava məkanının təhlükəsizliyinə dair təklifi də qəbuledilməzdir. Xankəndinə Azərbaycan dövlətinin icazəsi olmadan enən hər bir təyyarə Azərbaycanın hava məkanını pozmuş sayılır. İşğal altındakı torpaqlarımızda heç bir hava limanı fəaliyyət göstərə bilməz”.
İsmayıl
