Rusiya Avrasiya Birliyini Azərbaycanın yaxasından almaq istəyir

Azərbaycanın inadla Gömrük İttifaqı və Avrasiya Birliyindən imtinasına rəğmən Kreml Azərbaycandan əl çəkmək istəmir. Rusiya hələ də Azərbaycanın Gömrük İttifaqına qoşulacağına ümid edir. Halbuki Azərbaycanın ölkə başçısı bu məsələ ilə bağlı ortaya ciddi siyasi iradə qoyub və ölkəmizin heç bir halda bu birliklərə üzv olmayacağını vurğulayıb.Bütün bunlara rəğmən Rusiya Azərbaycanın yaxasından əl çəkmir. Vaxtaşırı Azərbaycanın bu qurumlara üzvlüyü məsələsini gündəmə gətirməklə bütün vasitələrlə bizi Gömrük İttifaqına dartır. İndi də Rusiya Dövlət Dumasının MDB işləri üzrə komitəsinin sədri Leonid Slutski qıcıqlandırıcı bəyanat yayıb ki, bir qədər gec olsa da, Azərbaycan Gömrük İttifaqına qoşulacaq. Sözsüz ki, komitə sədrinin bu bəyanatla ortaya atılması təsadüfi deyil və Azərbaycanın bu ittifaqa daxil olması üçün bir şantaj vasitəsidir. Politoloq Leyla Əliyevanın sözlərinə görə, rusiyalı komitə sədrinin bu cür iddialı danışması son zamanlar regionda baş verən proseslərlə bağlıdır: "Rusiya prezidenti Vladimir Putin hazırda iqtisadi inteqrasiyanı gündəmə gətirib. Belə ki, Rusiyanın əsas məqsədi postsovet ölkələrini Gömrük İttifaqı çərçivəsində birləşdirməkdir. Çox güman ki, komitə sədrinin Azərbaycanın gec, ya tez, Gömrük İttifaqına üzv olması ilə bağlı bəyanat verməsinin arxasında Putinin Bakıya uğurlu səfəri və Yanukoviçin Avropa Birliyi ilə assosiativ saziş imzalamaqdan üz döndərməsi kimi amillər dayanıb. Putinin Azərbaycana səfəri zamanı ölkəmizin Gömrük İttifaqına qoşulması ilə bağlı konkret razılaşma əldə olunmasa da, tam şəkildə imtina da olmadı. Rusiya da hesab edir ki, Ermənistan və Ukrayna Avropa Birliyinə inteqrasiyadan və assosiativ saziş imzalamaqdan son anda üz döndərdi. Buna Kreml həmin ölkələrə təzyiq etməklə nail olub. Onu da deyim ki, komitə sədri bu bəyanatla dünyaya eşitdirir ki, gec, ya tez, bütün MDB ölkələri Gömrük İttifaqına qoşulacaq və Rusiya öz kürsüsündən heç vaxt güzəştə getməyəcək”. L.Əliyevanın qənaətincə isə bu cür təzyiq və xəbərdarlıq xarakterli açıqlamalar məhz Rusiyanın zəifliyindən irəli gəlir: "Ukraynada vəziyyət çox gərgindir və indiki halda seçim etmək Yanukoviç üçün heç də asan məsələ deyil. Hər an Ukraynada proses müəyyən istiqamətlərə yayıla bilər. Həm Avropa Birliyi və Şərq tərəfdaşlığı ölkələrinin də baş verən hadisələrə müdaxiləsi istisna deyil. Bu mənada, Rusiya ehtiyatlandığı üçün prosesləri qabaqlamaq və özünü müdafiəyə çalışır”. İstənilən halda Azərbaycanın Gömrük İttifaqına üzv olmayacağını vurğulayan politoloqun sözlərinə görə, Azərbaycanın Avropa Birliyi ilə assosiativ saziş imzalamaması Rusiyaya əsas vermir ki, Azərbaycan nə vaxtsa Gömrük İttifaqına daxil ola bilər: "Avropa Birliyi ilə assosiativ saziş imzalamamaq Azərbaycan hökumətinin öz seçimidir. Görünür, dövlət öz neytrallığını qorumaq və beynəlxalq siyasətində balans yaratmaq istəyir. Bu neytrallıq isə müəyyən mənada ölkəmizə dividend qazandırır. Odur ki, Azərbaycanın rusiyalı komitə sədrinin dediyi kimi Gömrük ittifaqına daxil olması absurddur”.