"Rusiya İsrail və İran arasındakı qarşıdurmaya müdaxilə etməyəcək”.
Bu barədə "Sherg.az”a Suriyada yerləşən İsrail ordusunun İranın mövqelərini vurmasından danışarkən politoloq İlqar Vəlizadə bildirib.
O xatırladıb ki, İsrailin baş naziri Benyamin Netanyahu Moskvaya səfər edərək hərbi paradda iştirak edib:
"May ayının 9-u baş tutan səfərdə yaşananlar göstərdi ki, iki ölkə başçısı arasında yaxşı münasibətlər formalaşıb. İsrail və Rusiya arasındakı münasibətlər göstərir ki, rəsmi Moskva münaqişədə ən pis halda neytral mövqedə dayanacaq.
Hadisələrin gərginliyə doğru inkişafı Rusiya üçün əlverişli olmasa da, V. Putin regiondakı maraqlarını ön planda tutacaq. Çünki şimal qonşumuzun İsraillə münasibətlərinin pisləşməsi regiondakı mövqeyini də zəiflədə bilər. Hətta İran da birbaşa İsraillə qarşıdurmaya imkan verməyəcək və öz məqsədlərinə dolayı yolla çatmağa cəhd edəcək”.
Qeyd edək ki, Suriyada İsrail ordusu İranın mövqelərini vurmaq üçün 28 təyyarə və 70 raketdən istifadə edib. Suriya İnsan Hüquqları üzrə Təşkilatın verdiyi məlumata görə, bu hücum nəticəsində 28 nəfər həlak olub. İsrail ordusu isə heç bir itki verməyib. İsrail tərəfi bu addımını Suriyada Bəşər Əsəd rejimini dəstəkləyən İrana qarşı müdaxilə adlandırıb.
Aysel Aslan
