ABŞ bu ilin noyabr ayından Rusiyaya qarşı yeni və daha sərt sanksiyalar tətbiq etməyə hazırlaşır. Bu barədə ABŞ-ın Nümayəndələr Palatasında dinləmələr zamanı dövlət katibinin köməkçisi Manişa Sinqh bildirib.
Onun sözlərinə görə, buna səbəb Rusiyanın öz ərazisində kimyəvi və bioloji silah istehsalı ilə bağlı obyektlərdə təftişə yol verməməsidir. Sinqh əlavə edib ki, sanksiyaların birinci mərhələsi nəticəsində Rusiya on milyardlarla dollar həcmində maliyyə itkiləri ilə üzləşib. Analitiklərə görə, Rusiya sanksiyaların ikinci mərhələsindən də əziyyət çəkəcək, lakin heç bir halda kimyəvi və bioloji silah istehsalı ilə bağlı obyektlərdə təftişə imkan verməyəcək.
Politoloq Qabil Hüseynli də bəyan edib ki, indiki şəraitdə Rusiyanın qapılarını amerikalı mütəxəssislərə açacağı inandırıcı deyil. Siyasi şərhçinin sözlərinə görə, ekspert qrupu Rusiyaya girməyi bacarsa belə bütün məntəqələri təftiş edə bilməyəcəklər:
"Sovet dövründə, daha doğrusu, imperiyanın son zamanlarında buna bənzər sazişlər imzalanıb və qismən həyata keçirilib. Lakin Vladimir Putinin hakimiyyətindən sonra Rusiyanın tərksilah edilməsi prosesi tamamilə dayandırılıb. Bioloji silahlar çox təhlükəlidir və istənilən hal ciddi problemlər yarada bilər. Heç kim deyə bilməz ki, artıq bu cür silahlar Rusiyada yoxdur. Çox güman ki, ölkənin gözdən uzaq diyarlarında həmin texnikalar qalmaqdadır.
Əgər bu gün Kremlin himayə etdiyi Suriyada kimyəvi silahlar üzə çıxırsa, həmin silahların Rusiyada olmadığını söyləmək sadəlövhlük olar". Analitikə görə, Rusiyanın iqtisadi vəziyyəti dayanıqlıdır. Rusiya sovet dövründə etibarlı iqtisadi model quraraq, özünü beynəlxalq təzyiqlərdən qorumağı bacarırdı. Lakin imperiya dağıldıqdan sonra ölkə Qərblə rəqabətə girdi və yeni nanotexnologiyaları Rusiyaya gətirdi.
Nəticədə ölkənin demək olar ki, bütün iqtisadiyyatı Qərb avadanlıqları üzərinə quruldu. Ona görə də Rusiya təzyiqlərdən yan qaça bilmir. Şübhə yoxdur ki, budəfəki təzyiqlər paketi də ölkəyə təsirini göstərəcək".
İsmayıl
