Milli Məclisin Beynəlxalq münasibətlər və parlamentlərarası əlaqələr komitəsində Azərbaycanla Türkiyə arasında hərbi sahədə əməkdaşlıq sənədi müzakirə edilib.
Komitə sədri Səməd Seyidov bildirib ki, bu protokol Azərbaycan ilə Türkiyə arasında hərbi əməkdaşlığın inkişafına mühüm töhfə verəcək. İclasda həmçinin, "Azərbaycan-Türkiyə arasında mədəniyyət mərkəzlərinin təsis olunması, iş mexanizmi və fəaliyyətləri" haqqında sazişin təsdiq edilməsi də müzakirəyə çıxarılıb. Hər iki sənəd Milli Məclisin plenar iclasına tövsiyə edilib. Qardaş ölkə ilə hərbi əməkdaşlıq məsələsi mütəmadi olaraq gündəmə gələn və olduqca zəruri sayılan bir mövzudur. Məsələyə münasibət bildirən əksər ekspertlər də Türkiyə ilə hərbi müttəfiqliyi ən üst səviyyəyə çıxarmağın vaxtının çatdığını vurğulayırlar.
Politoloq Elçin Mirzəbəyli də "Şərq"ə açıqlamasında bildirib ki, indiki regional şərait Azərbaycan-Türkiyə əməkdaşlığının genişləndirilməsinə imkan verir:
"Əvvəllər bu əməkdaşlığa mane olan bir sıra faktorlar önə çəkilirdi. Məsələn, Türkiyənin NATO üzvü olması əsas gətirilirdi. Lakin bu gün Türkiyənin yeritdiyi siyasət kontekstində NATO üzvü olmaq Ankaranın digər dövlətlərlə hərbi əməkdaşlığına mane olmur. Hazırda bildiyiniz kimi, Türkiyənin Qətər dövlətində hərbi bazası var və Rusiyadan "S 400" raket kompleksləri alır. Bu baxımdan düşünürəm ki, Azərbaycanla qarşılıqlı hərbi əməkdaşlığın genişləndirilməsi və qarşılıqlı hərbi yardım haqqında sənədin imzalanması ikitərəfli əlaqələrə böyük töhfə verəcək. Türkiyə və Azərbaycan regionda sabitliyin qarantı olan dövlətlərdir və bu iki dövlətin hərbi əməkdaşlığı bölgədə təhlükəsizliyə xidmət edəcək".
İsmayıl
